„ქართუ ბანკის“ გენერალური დირექტორი სპეციალურ განცხადებას ავრცელებს

„ქართუ ბანკის“ გენერალური დირექტორი ზურაბ გელენიძე სპეციალურ განცხადებას ავრცელებს, რომლითაც უზენაესი სასამართლოს ყოფილი მოსამართლის, ბესარიონ ალავიძის ინტერვიუს ეხმაურება.

„2020 წლის იანვრიდან, 2023 წლის ოქტომბრამდე ვიკავებდი ენერგეტიკული და სატრანსპორტო აქტივების მფლობელი და მმართველი ჰოლდინგური კომპანიის გენერალური დირექტორის მოადგილის პოზიციას და ჯგუფში შემავალ ენერგეტიკული კომპანიებს ვმართავდი.

მას შემდეგ, რაც ჩემთვის ცნობილი გახდა, რომ უზენაესი სასამართლოს ყოფილი მოსამართლე ბესარიონ ალავიძე, დასაქმებული იყო ჩვენს ორგანიზაციაში - თბილისის ელექტრომიმწოდებელ კომპანია „თელმიკოში“ რიგით იურისტად, ჩავთვალე, რომ მისი კვალიფიკაციის, მეტად სარგებლიანად გამოყენება იყო შესაძლებელი, სხვადასხვა კომპანიების ზედა რგოლის მენეჯმენტში, მათ შორის კერძო მფლობელობაში არსებულ სატრანსპორტო კომპანიაში. სწორედ ამ წინადადებით მივმართე მას 2022 წლის ზაფხულში, რაზედაც როგორც განმიმარტა, მისი ჯანმრთელობის მდგომარეობიდან გამომდინარე უარი უნდა ეთქვა, რადგან სრული დატვირთვით ვერ დაიკავებდა შეთავაზებულ პოზიციებს, იქვე განხილული იყო კოვიდ-19 -ის რეგულაციების შესაბამისად, დისტანციურ რეჟიმში გარკვეულ პროექტებში ჩართვა. ამ შეხვედრის შემდეგ, დიალოგი აღარ გაგრძელებულა. სააქციო საზოგადოება „ქართუ ბანკის“ გენერალურ დირექტორად კი 2023 წლის ოქტომბერში დავინიშნე - ამ საუბრიდან, თითქმის წელიწად-ნახევრის შემდეგ.

ბესარიონ ალავიძის მიერ, „ქართუ ბანკის“ და ჩემი სახელის კონკრეტულ კონტექსტში და პერიოდში მოხსენიება არის სიცრუე“, - ნათქვამია ზურაბ გელენიძის განცხადებაში.