რატი ბრეგაძე: მიხეილ სააკაშვილი სხვადასხვა სახის ფაფებს და ნატურალურ წვენებს იღებს, ამის მყარი მტკიცებულებები გაგვაჩნია

იუსტიციის მინისტრის რატი ბრეგაძის განცხადებით, რუსთავის მე-12 პენიტენციურ დაწესებულებაში მყოფი მიხეილ სააკაშვილი, რომელიც დაკავების დღიდან შიმშილობს, სხვადასხვა სახის ფაფებს და ნატურალურ წვენებს იღებს.

როგორც ბრეგაძემ ტელეკომპანია "რუსთავი 2-ის" ეთერში განაცხადა, ამის დამადასტურებელი მტკიცებულებები გააჩნიათ.

"ჩვენ მოგვმართა საქართველოს პარლამენტის წევრმა სადეპუტატო კითხვით, რომელზეც ჩვენ ვალდებული ვიყავით, გაგვეცა პასუხი. მათ შორის იყო კითხვა - საკვებ პროდუქტებზე. პირველად ვამბობთ ამას ეთერში, რადგან ისედაც ძალიან მალე საჯარო გახდება.

დიახ მან თავიდან შემოსვლისას, როდესაც მიიღო საბანკო ბარათი შემოსახლებიდან 2 დღეში, მან შეიძინა საკვები პროდუქტები, შემდგომში როგორც იცით მან განაცხადა უარი ამ საკვები პროდუქტების მიღებაზე, გავიდა გარკვეული პერიოდი და ის დათანხმდა და საკუთარი სურვილით მიიღო გარკვეული ფაფები, სხვადასხვა სახის და ნატურალური წვენები, ასევე ის აგრძელებს იმ მედიკამენტების მიღებას, რომელიც გამოუწერეს ექიმებმა", - განაცხადა ბრეგაძემ.

საქართველოს მესამე პრეზიდენტი მიხეილ სააკაშვილი 1 ოქტომბერს, თბილისში დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან, 36-ე დღეა შიმშილობს. სააკაშვილის ადვოკატები და პირადი ექიმები მისი ჯანმრთელობის მდგომარეობის დამძიმებაზე საუბრობენ და ყოფილი პრეზიდენტის სამოქალაქო კლინიკაში გადაყვანას ითხოვენ.

ასევე დაგაინტერესებთ: 

🔵 "არ გაუწიოთ სამედიცინო დახმარება მთავრობის მაღალჩინოსნებს, მოქმედ პრეზიდენტს, პრემიერს, მინისტრთა კაბინეტს..." - საქართველოს კლინიკების ასოციაციის პრეზიდენტის მიმართვა მედიკოსებს