რატი იონათამიშვილი ევრობიუროკრატებზე: ევროინტეგრაციის პროცესს ისინი საკუთარი ინტერესებიდან გამომდინარე პოლიტიკური შანტაჟისთვის იყენებენ, მაგრამ ასეთი შანტაჟის ინსტრუმენტები ჩვენზე არ ჭრის

საქართველო პასუხისმგებლობით იცავს ვიზალიბერალიზაციის მიმართულებით 4-ივე კრიტერიუმს, მაგრამ სამწუხაროდ ევრობიუროკატებისთვის ამას მნიშვნელობა არ აქვს, რადგან ისინი უყურებენ არა ასოცირების შეთანხმებას, არამედ მხოლოდ იმას, როგორ გამოიყენონ საქართველო ინსტრუმენტად საკუთარი პოლიტიკური ინტერესებისათვის, ჩვენ კი ამის უფლებას არავის მივცემთ, - განაცხადა „დღის ქრონიკაში“ ადამიანის უფლებათა დაცვისა და სამოქალაქო ინტეგრაციის საპარლამენტო კომიტეტის თავმჯდომარე რატი იონათამიშვილმა.

„მათ [ევრობიუროკრატებს] რომ რაიმე კონკრეტული არგუმენტი ჰქონდეთ, 4 კრიტერიუმიდან რომელი მუხლის მიმართულებით აქვთ შიში, მერწმუნეთ, პირდაპირ დაწერდნენ და იტყოდნენ, ამისი ნამდვილად არ მოერიდებოდათ. როდესაც ზოგადად საუბრობენ და არცერთ მუხლს არ მიუთითებენ, ეს იმას ნიშნავს, რომ საქართველო კეთილსინდისიერად და პასუხისმგებლობით იცავს 4-ივე კრიტერიუმს, მაგრამ სამწუხაროდ მათთვის ამას მნიშვნელობა არ აქვს, რადგან ისინი უყურებენ არა ასოცირების შეთანხმებას, არა ნაკისრი ვალდებულებების განხორციელებას, არამედ მხოლოდ იმას, როგორ გამოიყენონ საქართველო ინსტრუმენტად საკუთარი პოლიტიკური ინტერესებისათვის, ჩვენ კი ამის უფლებას არავის მივცემთ“, - აღნიშნა რატი იონათამიშვილმა.

დეპუტატის თქმით, ევრიბიუროკრატები ორმაგი სტანდარტსა და უსამართლობის ტირაჟირების გარდა, დაკავებულები არიან გარკვეული შანტაჟის მექანიზმებით.

„ევროინტეგრაციის პროცესს ისინი საკუთარი ინტერესებიდან გამომდინარე პოლიტიკური შანტაჟისთვის იყენებენ, მაგრამ ჩვენ ძალიან კარგად ვიცით ისიც, რომ ასეთი შანტაჟის ინსტრუმენტები ჩვენზე არ ჭრის“, - აღნიშნა იონათამიშვილმა.