"როგორ ფიქრობთ, 13 გაფორმებული იარაღი აქვს ჩემს მეუღლეს და ეს 2 იარაღი უკანონო ჰქონდა?! 3 თვის წინ მეუფე იაკობმა გვითხრა, რომ ჩვენი ოჯახის ლიკვიდაცია იგეგმებოდა" - გოგაშვილის ცოლი

სახელმწიფო უსაფრთხოების სამსახურის ხელმძღვანელის ყოფილი მოადგილის, სოსო გოგაშვილის ცოლის ინფორმაციით, გოგაშვილი 3 მუხლით არის დაკავებული, მათ შორის არის სსკ-ის 236-ე მუხლი და 157-ე მუხლის მე-4 ნაწილი.

236-ე მუხლი - ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენას, შენახვას, ტარებას, დამზადებას, გადაზიდვას, გადაგზავნას ან გასაღებას გულისხმობს.

157-ე მუხლი - კი პირადი ცხოვრების ამსახველი ინფორმაციის ან პერსონალური მონაცემების ხელყოფას ითვალისწინებს.

"შევარდნენ ოთახში, ამ დროს მივყვებოდი, რას აკეთებთ-მეთქი, ჩემი თვალით დავინახე, ბიბლიაზე დავიფიცებ, პატრიარქთანაც მივალ, ლეიბის ქვეშ ამოდეს იარაღი. გამოხსნეს კარადა და კალაშნიკოვი [დადეს] როგორ ფიქრობთ, 13 გაფორმებული იარაღი აქვს ჩემს მეუღლეს და ეს 2 იარაღი უკანონო ჰქონდა?!

შევეწინააღმდეგე და ღამბაშიძემ მომკიდა ხელები, დაუძახა ბიჭებს, აქ რა უნდა, რატომ ამოიყვანეთო. ხელები მტკივა.

ბოლოს რატომაც მოიშორეს, ეს იყო უცხოელებთან კონტაქტი. ნამდვილად ეშინიათ, რომ არ ეშინოდეთ... ვერც წილები უნახეს, ვერც სიბინძურეები.

ჩემმა მეუღლემ თქვა, სანამ პარტიარქი ცოცხალი იქნება და პატრიარქს ვინმე შეეხება უდიერად, მზად იყავი, რომ მე მის მაგივრად მივდივარ ტყვიაზეო.

არა მარტო დიპლომატიურ კორპუსს, ყველას შეხვდა, არა სამთავრობოებსაც.

მე მინდა, სახალხო დამცველს მივმართო, ძალიან ვთხოვ, დამეხმაროს, მე არ ვიცი, ჩემი მეუღლე სად წაიყვანეს", - აცხადებს გოგაშვილის ცოლი.

როგორც გოგაშვილის ცოლი აცხადებს, მათ ოჯახის წევრების ლიკვიდაცია იგეგმებოდა, ხოლო ამის შესახებ ინფორმაცია მეუფე იაკობმა მიაწოდა.

"3 თუ 4 თვის წინ ჩვენთან მეუფე იაკობი იმყოფებოდა, და გვითხრა, მეუღლეს უთხრა, რომ შენზე იგეგმება ლიკვიდაციაო, ეს კი მოდისო ივანიშვილი ღარიბაშვილი და ლილუაშვილის გვარი დაასახელა. ანუ ვერ მოხერხდა რომ, ჩვენ ჩავეცხრილეთ და ის მოხდა რაც წუხელ ნახეთ", - განაცხადა გოგაშვილის ცოლმა.

სახელმწიფო უსაფრთხოების სამსახურის უფროსის ყოფილი მოადგილე, სოსო გოგაშვილი სპეცოპერაციის შედეგად საკუთარ სახლში გვიან ღამით აიყვანეს.

ცნობისთვის, სოსო გოგაშვილმა გუშინ დაწერა, რომ არჩევნების გაყალბების მტკიცებულებები ჰქონდა, რომელიც "შესაბამის ორგანიზაციას" გადასცა. რამდენიმე დღის წინ კი გია გაჩეჩილაძემ (უცნობი) აუდიოჩანაწერი გაავრცელა, რომელიც მთავარი არხის ჟურნალისტების ფარული მიყურადებით იყო მოპოვებული. აღნიშნულ აუდიოჩანაწერში საუბარი იყო სოსო გოგაშვილზეც.

სოსო გოგაშვილმა ქართული ოცნება 2020 წლის ოქტომბერში დატოვა. ის სახელმწიფო უსაფრთხოების სამსახურის უფროსის მოადგილედ 2015-2018 წლებში მუშაობდა. 2014 წელს შსს-ს გენინსპექციის უფროსი იყო. გოგაშვილი ხელმძღვანელობდა პანკისის ხეობაში ჩატარებულ სპეცოპერაციას, რა დროსაც 19 წლის თემირლან მაჩალიკაშვილი მოკლეს.

ამავე თემაზე:

* "მამა რომ დააკავეს, დედა გახდა შეუძლოდ და 4 საათის განმავლობაში სასწრაფოს გამოძახების უფლება არ მისცეს - სახლში დანაშაულებრივი და უკანონო გზით ჩაგვიდეს ორი იარაღი"

*  სპეცოპერაცია სოსო გოგაშვილის სახლში - სამართალდამცველებმა სუს-ის ყოფილი მაღალჩინოსანი დააკავეს

* "ეს არის დასაწყისი - არ მამოძრავებს შურისძიება, ვითხოვ სამართლიანობის აღდგენას" - მალხაზ მაჩალიკაშვილი გოგაშვილის დაკავებაზე