შალვა პაპუაშვილი: პარლამენტი ინტერპელაციის წესით პრემიერ-მინისტრს 2 თემასთან დაკავშირებით მოუსმენს - ესენია 6.5-მილიარდიანი ინვესტიცია და უმაღლესი განათლების რეფორმა

საქართველოს პარლამენტის თავმჯდომარის, შალვა პაპუაშვილის განცხადებით, ხვალ პარლამენტი ინტერპელაციის წესით პრემიერ-მინისტრ ირაკლი კობახიძეს 2 თემასთან დაკავშირებით მოუსმენს, ესენია 6.5-მილიარდიანი ინვესტიცია და უმაღლესი განათლების რეფორმა.

როგორც პაპუაშვილმა აღნიშნა, პრემიერი ყველა კითხვას ამომწურავ პასუხს გასცემს.

„ორ თემასთან დაკავშირებით ფრაქცია „ქართულ ოცნებას“ აქვს ინტერპელაციაზე დაყენებული საკითხები. ერთი ეხება 6,5-მილიარდიან ინვესტიციას და Eagle Hills-თან ერთად განსახორციელებელ პროექტს. ყველა საკითხი, საფუძვლიანი თუ უსაფუძვლო, რეალური თუ არარეალური, ყველა ეს კითხვა წარმოდგენილია ამ ინტერპელაციაში და პრემიერ-მინისტრი ყველა ამ კითხვას პასუხს გასცემს.

მეორე საკითხი გახლავთ უმაღლესი განათლების რეფორმა და ამასთან დაკავშირებითაც ექნება დეტალური საუბარი პრემიერს. პროცედურები არის ასეთი, კითხვები გაგზავნილია ინტერპელაციის წესით, რომელსაც პრემიერ-მინისტრი უპასუხებს, თუმცა ადგილზეც აქვთ შესაძლებლობა ფრაქციებს, მათ შორის ოპოზიციურ ფრაქციებსაც, დასვან 2-2 ზეპირი შეკითხვა“, - აღნიშნა შალვა პაპუაშვილმა.

პარლამენტი ინტერპელაციის წესით პრემიერ-მინისტრ ირაკლი კობახიძეს 26 ნოემბერს მოუსმენს.