თენგიზ შარმანაშვილი ფასებზე: პარლამენტი სრულად იქნება ჩართული ამ საკითხში, შესაბამისი კომისიაც შეიქმნება. ჩვენც გვექნება შეხვედრები ბიზნესთან, ასევე გვექნება შეხვედრები ჩვენს მოქალაქეებთან, გავარკვევთ მათ წინაშე რა პრობლემებია

„პარლამენტი სრულად იქნება ჩართული ამ საკითხში, შესაბამისი კომისიაც შეიქმნება. ჩვენც გვექნება შეხვედრები ბიზნესთან, ასევე გვექნება შეხვედრები ჩვენს მოქალაქეებთან“, - განაცხადა გადაცემა „დღის ქრონიკაში“ თავდაცვისა და უსაფრთხოების საპარლამენტო კომიტეტის თავმჯდომარის პირველმა მოადგილემ, თენგიზ შარმანაშვილმა სასურსათო პროდუქციის ფასებთან დაკავშირებით საუბრისას.

შარმანაშვილის თქმით, გაარკვევენ რა პრობლემებია მოქალაქეების წინაშე და როგორ წარმოუდგენიათ ამ პრობლემების გადაჭრა.

„პასუხი ამ ყველაფერზე, რაც ჩვენმა პრემიერმა დააანონსა ცოტა ხნის წინ და შემდგომში შეიქმნა ეს კომისია, გამომდინარეობს საქართველოს კონსტიტუციიდან. ამაზე ხშირად არ ვლაპარაკობთ ხოლმე, მაგრამ საქართველოს კონსტიტუციის მეხუთე მუხლი აცხადებს, რომ საქართველო არის სოციალური სახელმწიფო, ხოლო ამ მეხუთე მუხლის მეორე პუნქტი ამბობს, რომ სახელმწიფო ეფუძნება და ხელს უწყობს სოციალური სამართლიანობის პრინციპის დამკვიდრებას. რაც მთავარია სოლიდარობის პრინციპის დაფუძნებას. ე.ი ეს სოლიდარობა არის განსაკუთრებული მნიშვნელობის. ამიტომ, ყველა ადამიანი, მათ შორის ბიზნესიც უნდა იყოს სოციალურად პასუხისმგებელი რაც ქვეყანაში ხდება და სოლიდარობის გრძნობა უნდა ჰქონდეთ. რა თქმა უნდა, მთელი ბიზნესი უნდა ეფუძნებოდეს მისი განვითარების თავისუფლებას, ამ თავისუფალი ბაზრის პრინციპებს, მაგრამ ამავე დროს კონსტიტუცია ამბობს, რომ ეს ყველაფერი უნდა იყოს სოციალური სოლიდარობის პრინციპებიდან გამომდინარე. ამიტომ, მოხარული ვარ, რომ საპასუხო ნაბიჯები გადმოდგა ამ ინიციატივის მიმართულებით თვითონ ბიზნესმაც, მათმა წარმომადგენლებმაც, შემოვიდნენ დიალოგში და ისინი მზად არიან ამ სისტემის დახვეწისთვის.

ეს, რა თქმა უნდა, დაიხვეწება. თუ ამას რაიმე საკანონმდებლო რეგულაციები დასჭირდება, ჩვენ არ დავაყოვნებთ - შესაბამისი საკანონმდებლო ახალი რეგულაციების შემოღებას საჭიროების შემთხვევაში“, - აღნიშნა თენგიზ შარმანაშვილმა.

მისივე თქმით, ამოცანა არ არის, რომ საკითხი დროებით მოგვარდეს, არამედ სამართლიანი თამაშის წესები დამკვიდრდეს.

„პრაქტიკულად გამოირიცხოს კარტელური გარიგებები, რომლებიც ფასების ხელოვნურ ზრდას შეუწყობს ხელს. არ დაზიანდეს ბიზნესინტერესებიც იმიტომ, რომ ჩვენ სამართლიანად ვამაყობთ, რომ რეგიონში ერთ-ერთი საუკეთესო მაჩვენებელი გვაქვს და არა მხოლოდ რეგიონში, ევროპის მასშტაბითაც ეკონომიკური ზრდისა“, - განაცხადა თენგიზ შარმანაშვილმა.