თენგიზ შარმანაშვილი: იმ ფონზე, როდესაც უკრაინა ლამის განადგურების პირასაა და ხალხი უმძიმეს მდგომარეობაშია, საფრანგეთის პრეზიდენტი ამბობს, რომ ერთიანი უსაფრთხოების სისტემა უნდა ააშენოს რუსეთთან

„იმ ფონზე, როდესაც უკრაინა ლამის განადგურების პირასაა და ხალხი უმძიმეს მდგომარეობაშია, ათასობით ადამიანი ყოველდღიურად იხოცება, საფრანგეთის პრეზიდენტი ლაპარაკობს, რომ ერთიანი უსაფრთხოების სისტემა უნდა ააშენოს რუსეთთან“, - ასე გამოეხმაურა პარლამენტის თავდაცვისა და უსაფრთხოების კომიტეტის თავმჯდომარის პირველი მოადგილე თენგიზ შარმანაშვილი უკრაინაში რუსეთის სრულმასშტაბიანი შეჭრიდან 4 წლის თავს.

მისი თქმით, სამხედრო სტრატეგია არ სჭირდება იმ ფაქტს, რა დაემართებოდა საქართველოს იმ შემთხვევაში, სულ მინიმალური დოზით ის რომ განმეორებულიყო, რაც უკრაინის საჰაერო სივრცეში ხდება.

„საქართველოს ტერიტორიის სიმცირე წარმოიდგინეთ, 40 კმ-ში არის მათი საოკუპაციო არმია განლაგებული. ჩვენ ამ ავანტიურას რომ წამოვგებოდით, საერთოდ რუსების ერთ ჯარისკაცსაც რომ არ შემოედგა ფეხი საქართველოს ხელისუფლების კონტროლირებად ტერიტორიაზე, სამი დღე რომ არ ესროლათ რაკეტები და დრონები უკრაინისთვის და ეს სამი დღე ის რაოდენობა ესროლათ მცირემიწიანი საქართველოსთვის, რა დიდი სამხედრო სტრატეგია სჭირდება იმას, რა დაგვემართებოდა. რეალობა არის ეს და რეალობა არის ის, რომ ამ ფონზე, როდესაც უკრაინა ლამის განადგურების პირასაა და ხალხი უმძიმეს მდგომარეობაშია, ათასობით ადამიანი ყოველდღიურად იხოცება, საფრანგეთის პრეზიდენტი ლაპარაკობს, რომ ერთიანი უსაფრთხოების სისტემა უნდა ააშენოს რუსეთთან“, - აცხადებს თენგიზ შარმანაშვილი.

ინფორმაციისთვის, უკრაინაში რუსეთის სრულმასშტაბიანი შეჭრიდან 4 წელი გავიდა.