დღეს დიდი სირცხვილი ვჭამე - ჩამეძინა და... - რას წერს თამარ ჩერგოლეიშვილი

"ტაბულას" დამფუძნებელი თამარ ჩერგოლეიშვილი, ფეისბუკის საკუთარ გვერდზე ვრცელ პოსტს აქვეყნებს:

"დღეს დიდი სირცხვილი ვჭამე - ჩამეძინა და ტვ პირველზე წასვლის ნაცვლად, საკუთარ ლოგინში გადავტრიალდი.

მე ვიძულებ ცოტა ხნით სტუმარს რომელიც გადამაგდებს და დამსახურებულად შეუძლიათ შემიძულონ 🙂

რუსული პროპგანადა უნდა ყოფილიყო თემა და აქ ვიტყვი, რა სათქმელიც მქონდა.

პროპაგანდა რუსული ჰიბრიდული ომის ერთ-ერთი უმნიშვნელოვანესი კომპონენტია, ცხადია გაცილებით მნიშვნელოვან სამხედრო კომპონენტთან და ენერგო- რესურსებთან ერთად.

რუსეთი დგას შიშზე.

შიშის კულტივირებაა რუსული პროპაგანდის ამოცანაც.

პროპაგანდის ეფექტიანობას ის განაპირობებს, რომ ეს შიშები არ არის მოგონილი.

რუსული პროპაგანდა სამიზნე მოსახლების რაციონალურ შიშებს ირაციონალურ შიშებად გარდაქმნის იმისთვის, რომ არგუმენტებით გაცამტვერება შეუძლებელი გახდეს.

რაციონალური შიშია ომის შიში, რასაც პროპაგანდა იოლად გარდაქმნის რუსეთის უძლეველობის ირაციონალურ შიშად.

რაციონალური შიშია სიღატაკის შიში, რასაც პროპაგანდა იოლად გარდაქმნის ირაციონალურ შიშად, რომ ჩვენი პროდუქტი დასავლეთს არ აინტერესებს და რუსული ბაზრისთვის უნდა ვიბრძოლოთ.

რაციონალური შიშია უცხოსადმი შიში რაც იოლად გარდაიქმნება კულტურული იდენტობის დაკარგვის ირაციონალურ შიშად.

მოკლედ, რუსეთი რაციონალურ და საფუძვლიან შიშს იღებს, ირაციონალურად გარდაქმნის იმისთვის რომ ისტერიკად იქცეს და არგუმენტები დააუძლუროს და ამ ნიაღვარში ყველამ ხელი ჩაიქნიოს სიმართლის რკვევაზე.

ირაციონალურად შეშინებული ადამიანი უძლურია - ალბათ გინახავთ, თვითმფრინავის შიშით შეპყრობილი მგზავრი, რომელიც მგზავრობის განმავლობაში დაუძლურებულია და ვერ ფოკუსირდება, ნერვიულობს - ამიტომ სვამს,  თავს ითიშავს. თვითმფრინავის კატასტროფების სტატისტიკა და რიცხვები არ ეხმარება, უხსენი რამდენიც გინდა რომ მანქანაში მეტი ადამიანი იღუპება. რაციონალიზაცია წარმოუდგენელია - სიმთვრალე ურჩევნია.

რუსული პროპაგანდის ნიაღვართან პროპაგანდით ბრძოლა პროპაგანდის გამარჯვებაა.

პროპაგანდას შეიძლება დაუპირისპირდე სიფხიზლით და სიმართლით.

ეს საერთოდ არ ნიშნავს, რომ კრემლისტურ ნიაღვარში სათითაო სიცრუეები უნდა ვარჩიოთ, ეს შეუძლებელია და წყლის ნაყვაა - სანამ სიმართლე შარვალს იცმევს, ტყუილი მსოფლიოს სამ წრეს არტყამს. სიმართლეს დრო სჭირდება, ტყუილი - იოლია.

ეს იმას ნიშნავს, რომ ჩვენ რუსული პროპაგანდის ანატომია უნდა გავითავისოთ ძვლებამდე, ტვინის ყველა ხვეულამდე, რომ ნიაღვარში იოლად გავიკვლიოთ გზა.

მაგალითად დავიმახსოვროთ, რომ სწორის და არასწორის, მტყუანის და მართლის განუკითხავობა არის რუსული პროპაგანდის მთავარი ამოცანა.

რუსული პროპაგანდის ამოცანა არ არის დაგაჯეროთ რამე, რუსული პროპაგანდის ამოცანა არის ყველანაირ რწმენაზე ხელი აგაღებინონ და დაიჯერო რომ სიმართლე არ არსებობს, ყველა ერთი ნაგავია და ყველაფერი მოსულა - გაიძულებს, რომ  შიშებით  იმოქმედო და არა პრინციპებით.

ამიტომ, როდესაც ხედავთ რომ მედია დისკუსიას კლავს სწორზე და არასწორზე - თავისუფლად შეგიძლიათ ეს რუსული პროპაგანდის სამსახურად ჩათვალოთ და ამხილოთ.

როდესაც ხედავთ, რომ სამოქალაქო საზოგადოება აღარ არჩევს სწორს და არასწორს, გაიძახის რომ ყველა ერთნაირად ბინძურია და პირველი ქვა უცოდველმა ისროლოს - თავისუფლად შეგიძლიათ ეს რუსული პროპაგანდის სამსახურად ჩათვალოთ და ამხილოთ.

როდესაც ვიღაც გიმტკიცებთ, რომ ის არა პროდასავლელი, არამედ პროქართველია - თავისუფლად შეგიძლიათ პუტინის პროპაგანდისტად ჩათვალოთ, იმიტომ რომ პროქართველობა თავისთავად გულისხმობს პროდასავლელობას, რომ ჩვენი ეროვნული აზროვნების დამფუძნებელი მამა - ბურთივით მრგვალი ლიბერალია!

სიმართლე და სიფხიზლე არის რუსული პროპაგანდის წინააღმდეგ იარაღი. (და რასაკვირველია წარმატება - ეროვნული წარმატებები, რომელიც ასე გვაკლია)",-წერს, თამარ ჩერგოლეიშვილი.

ასევე დაგაინტერე­­­­სებთ:

🔵„რატომ არ კვდება შენი ხათუნა“ - რუსეთის აგრესიას ხათუნა ხოფერიას ძმა ემსხვერპლა

🔵ომში დაღუპული ჯარისკაცების ცოლებს ნუ ეტყვით, რომ იყვნენ ამაყები - ნინო თარხნიშვილი

🔵ჰყავს თუ არა პუტინს ორეულები?