"ვიცნობ ადამიანებს, რომლებიც ოჯახის სიწმინდის დღეს აღნიშნავენ და სანამ შინ ცოლი სადილს უმზადებს, ქმარი საყვარელთანაა. გარყვნილებას ბევრი ფორმა აქვს, ეს ერთ-ერთია"

მხატვარი ლევან სონღულაშვილი, სოციალურ ქსელში "ოჯახის სიწმინდესა" და პრაიდის თემაზე ვრცელ პოსტს აქვეყნებს, რომელსაც უცვლელად გთავაზობთ:

"ოჯახის სიწმინდის დღეზე და პრაიდზედ:

უშუალოდ ვიცნობ ადამიანებს, რომლებიც ოჯახის სიწმინდის დღეს აღნიშნავენ და სანამ შინ ცოლი სადილს უმზადებს, ქმარი საყვარელთანაა, მეგობრების წრეში კი თავს იწონებს იმედგაცრუებული ქალების რაოდენობით;

ცოლები, რომელთაც ეს ინფორმაცია აქვთ, ან ეჭვობენ, დილემის წინაშე დგანან, სასწორზე დააყენონ ოჯახის სიმტკიცე, თავადაც გაიჩინონ საყვარელი, თუ გამართლება უპოვონ ქმრის საქციელს და მომავალ წელს ერთად შეეგებონ "ოჯახის სიწმინდის დღეს", - გარყვნილებას ბევრი ფორმა აქვს, ეს ერთ-ერთია.

პრაიდი, ის, რომ კონსერვატიულად განწყობილ საზოგადოებაში ეს უმძიმესი ტრაგედიაა, გასაგებია, თუმცა იგივე რელიგია, რომელიც მიმტევებლობას, სიყვარულს და სხვისი განკითხვის უუფლებობას ქადაგებს, მათგან განსხვავებული სოციუმის მიმართ აგრესიას, ძალისმიერ მეთოდებს, სისხლის ღვრასაც კი, არ ერიდება.

არაერთმა ოჯახიც შექმნა, თუმცა "ძველ ჩვევას" ვერ გადაეჩვია, მოგვიანებით, ოჯახი დაენგრა, ან ჯერაც ინარჩუნებს - აქ, ყველაზე მეტად ცოლ-შვილი მებრალება.

ამ დროს იტყვით, სახლის კარს არავინ უმტვრევს, შინ რაც უნდათ უკეთებიათ და პროპაგანდას ნუ ეწევიანო...

აქვე ვიტყვი, არსებობს ფაქტები, როცა სახლშიც შეუვარდნენ, სადარბაზოში ცემით იმსხვერპლეს, საუბრის მანერის გამო მის პროფესიონალიზმზე უარი თქვეს, ბულინგის მსხვერპლი გახდა, როგორც ოჯახში, ისე გარეთ.

და მაინც, გეთანხმებით, ზოგადად, ინტიმური ცხოვრების საჯარო სივრცეში დემონსტრირება და ეგზიბიციონიზმი, გადამეტებულია, თუმცა კანონი არეგულირებს სამოქალაქო ცხოვრების წესრიგს, წინააღმდეგ შემთხვევაში, ადამიანებში დაგროვილი აგრესია საყოველთაო სისხლისღვრად იქცეოდა, განსაკუთრებით, პოლარიზებულ გარემოში.

მინდა ყველამ სწორად გაიაზროს, რომ საქართველო გაცილებით მნიშვნელოვანი გარდატეხების წინაშე დგას, რომლის ტერიტორიაც ყოველწლიურად მცირდება, იტაცებენ ჩვენს მოქალაქეებს, ისაკუთრებენ სოფლებს, კარ-მიდამოს, მძიმე სოციალური პირობებისა და განათლების ხარისხის ვარდნის, მსოფლიო პანდემიისა და მეზობელ ქვეყანაში ომის კვლალდაკვალ...

ბნელი ოკუპანტის პოპულისტური ნარატივი სულიერებაზე, ტრადიციებსა და სექსუალურ კოდექსზე ურტყამს იმ მასას, ვისი ღირებულებებიც, ერთი შეხედვით, ტრადიციებზე დგას, თუმცა ვერ იაზრებთ, რომ პუტინი სწორედ ამ ფასეულობებს ანგრევს და ეროვნული იდენტობის გაქრობას ცდილობს, რაც კამფეტივითაა შეფუთული.

ის ევროპა, რასაც მე და ჩემი მეგობრები ვეხებით, მხოლოდ სიმდიდრე და ძალაუფლება არაა, პირველ რიგში, ღირებულებებია, კანონის და ადამიანის უზენაესობა, ურთიერთგაგება და ურთიერთპატივისცემა, თანასწორობა, სოლიდარობა, და რაც მთავარია, მშვიდობა", - წერს სონღულაშვილი.

ასევე დაგაინტერესებთ:

* "ვალეს" სასაზღვრო სექტორში საზღვრის უკანონოდ ჯგუფურად გადაკვეთის მცდელობისთვის უცხო ქვეყნის 5 მოქალაქე დააკავეს

* საქართველოში კოვიდინფიცირების 2 570 ახალი შემთხვევა გამოვლინდა, გარდაიცვალა 3 პაციენტი