„ომის 26-ე დღეა და უკრაინელები ისევ კბილებით იცავენ ყველა პოზიციას და უფრო ხშირად გადადიან კონტრშეტევაზე“ - თინათინ რუხაძის მიმოხილვა

კვლევითი-საკონსულტაციო კომპანია „ეისითი“-ს დამფუძნებელი და გენერალური დირექტორი და ფსიქოლოგიის მაგისტრის, თინათინ რუხაძის მიმოხილვა უკრაინაში მიმდინარე საომარ მოვლენებთან დაკავშირებით.

21.03 - მარიუპოლის სიმტკიცის ღამე!

ომის 26-ე დღეა და უკრაინელები ისევ კბილებით იცავენ ყველა პოზიციას და უფრო ხშირად გადადიან კონტრშეტევაზე. ყველა ძირითადი ქალაქი ისევ უკრაინის კონტროლის ქვეშაა.

რუსებმა უკრაინელებს შესთავაზეს მარიუპოლის დანებება და სანაცვლოდ მშვიდობიანი მოსახლეობის გათავისუფლება. მათ 8 ფურცლიანი ბოდვა მისწერეს მარიუპოლის მერიას, "ისტორიული" წიაღსვლებით და დილის 5 საათამდე მისცეს დრო კაპიტულაციამდე. რაზედაც მიიღეს უმოკლესი პასუხი: "Х*й вам, а не Мариуполь". ულტიმატუმის დრო გავიდა. ფაქტია, რომ ქალაქი არ დანებდა და განაგრძობს სამკვდრო-სასიცოცხლო ბრძოლას.

შეგახსენებთ, რომ მარიუპოლი უკვე მე-20 დღეა ბლოკადაშია, ქალაქის 80-90% დანგრეულია, გარდაცვლილია ათასობით ადამიანი, ულტიმატუმამდე გუშინ რუსებმა დაბომბეს ხელოვნების სკოლა, რომელსაც თავს აფარებდა 400 ადამიანი: ძირითადად ქალები, ბავშვები და მოხუცები - ხალხი ნანგრევების ქვეშაა მოყოლილი. და მაინც, მარიუპოლი არ ნებდება!

ღამე კიევში აფეთქებების ხმა ისმოდა ისტორიულ ცენტრში, პოდოლსკის რაიონში. შედეგად მოკლულია 4 ადამიანი და 1 ჰოსპიტალიზებული, 200 ევაკუირებულია. დაიწვა სავაჭრო ცენტრი, დაზიანდა გარშემო შენობები.

ქ. სუმიში მოხდა ამიაკის გაჟონვა ქარხანა "სუმიქიმპრომიდან". ამიაკის მომწამვლელი ზეგავლენის ზონა 2,5 კმ-ია. თუმცა ამ ეტაპზე სუმის მოსახლეობა რისკის ქვეშ არ დგას.

კვირას გააქტიურდა რუსეთის ავიაცია - სუმის რაიონში დაფიქსირდა თვითმფრინავების დიდი რაოდენობა, რომელიც რუსეთის მხრიდან უკრაინის სიღრმეში გაფრინდა. ეტყობა, სიცოცხლე მობეზრდათ - ველოდებით მათი ჩამოგდების ცნობებს. 

WSJ აშშ-ს მაღალჩინოსნებზე დაყრდნობით, წერს რომ პუტინს აღარ აქვს კიევის აღება მიზნად. 3-კვირიანი ომის შემდეგ მან შეცვალა ტაქტიკა და ახლა ცდილობს უკრაინას მიაღებინოს რუსეთის პრეტენზიები სამხრეთ და აღმოსავლეთ ტერიტორიებთან მიმართებაში.

ბელორუსი რკინიგზელები აჩერებენ რუსეთიდან მომავალ მატარებლებს - ისინი მოქმედებენ პარტიზანულად და ახდენენ საბოტაჟს. ყოველდღიურად ვრცელდება ინფორმაცია მათ მიერ სარკინიგზო გზის, რკინიგზის მართვის სისტემებისა, და რუსული სამხედრო ტექნიკის მიზანმიმართული დაზიანების შესახებ.

გუშინ ზელენსკიმ ქნესეთს სიტყვით მიმართა. მგონი, ეს პირველი შემთხვევაა, როცა უცხო ქვეყნის მოქალაქე სიტყვით გამოვიდა ისრაელის პარლამენტში. მან განაცხადა, რომ რუსები ისევე ცდილობენ უკრაინელების განადგურებას, როგორც ფაშისტური გერმანია ებრაელების გენოციდს. და მოუწოდა მათ უკრაინის დახმარებისკენ. ზელენსკის სიტყვის მოსასმენად და უკრაინის მხარდასაჭერად ისრაელში ათასობით ადამიანი გამოვიდა.

ბაიდენი პარასკევს ჩავა ევროპაში NATO-ს სპეციალურ სხდომაზე, თუმცა არ აპირებს უკრაინაში ვიზიტს. ის აპირებს უკრაინაში გაეროს მშვიდობისმყოფელი ჯარების შეყვანაზე მსჯელობას. ამასთან აშშ-მ განაცხადა, რომ მისი ჯარები არ შევლენ ამ ეტაპზე უკრაინაში საომრად, თუმცა NATO-ს სხვა ქვეყნებმა შეიძლება გადაწყვიტონ თავიანთი ჯარის შეყვანა. (ნეტა ეს მინიშნებაა, რომ ასე მოხდება თუ უბრალოდ თავის არიდება?)

ბაიდენი დიდი შვიდეულსა და ნატოსთან შეხვედრების მერე აპირებს პოლონეთის პრეზიდენტთან შეხვედრას, რათა განიხილოს უკრაინის საერთაშორისო დახმარებისა და უპრეცედენტო სანქციების კიდევ უფრო გაფართოების საკითხი.

ბორის ჯონსონი ზელენსკის დაჰპირდა, რომ დიდი შვიდეულსა და ნატოსთან შეხვედრებზე უკრაინის ინტერესებს ბოლომდე დაიცავს. ვნახოთ რა შედეგებს მიაღწევს...

CSB-ის ეთერში სიტყვით გამოვიდა აშშ-ში ჩინეთის ელჩი და სიტყვა სიტყვით განაცხადა შემდეგი: "არსებობს დეზინფორმაცია იმის შესახებ, რომ ჩინეთი სამხედრო დახმარებას უწევს რუსეთს. ჩვენ ამას უარყოფთ..." მან ასევე განაცხადა, რომ მოუწოდებენ რუსეთს ომის დასრულებისკენ და მშვიდობის აღდგენისკენ.

უკრაინულმა მხარემ დაადასტურა, რომ რუსეთთან ონლაინ მოლაპარაკება 21 მარტს განახლდება.
დღეს ორშაბათია, და ყველას გვჭირდება ენერგია რომ გავუმკლავდეთ იმ ტკივილს, რასაც უკრაინელი ხალხის ტანჯვისგან ვგრძნობთ, და მოვემართოთ ახალი სამუშაო კვირისთვის. ამიტომ გიზიარებთ ფოტოებს, რომელიც შეგახსენებთ, რომ უკრაინაში არათუ ხალხი, ცხოველებიც გმირები არიან. ჰოდა ამ გმირების იმედით, მათ მხარდასაჭერად და მტრის ჯინაზე მოვიკრიბოთ ძალა და ვიშრომოთ, შევქმნათ, ვიბრძოლოთ ჩვენი ქვეყნისთვის და დავეხმაროთ უკრაინას როგორც შეგვიძლია.

აგრეთვე დაგაინტერესებთ:

📌 სუმში ქიმიური მრეწველობის ქარხანაში ამიაკის გაჟონვა მოხდა

📌 „ადგილზე 4 ადამიანი დაიღუპა, 1 კი - დაშავდა“ - კიევში სავაჭრო ცენტრი დაბომბეს

📌 პუტინი ბრძოლის ტაქტიკას ცვლის?