"როდის დამთავრდება ომი უკრაინაში?" - ზელენსკის პასუხი

უკრაინის პრეზიდენტის ვოლოდიმირ ზელენსკის თქმით, უკრაინაში ომის ხანგრძლივობა და მშვიდობის დამყარება დამოკიდებულია ბრძოლის ველზე უკრაინელების ბრძოლისუნარიანობაზე და მტკიცე მხარდაჭერაზე, როგორც მორალურად ისე იარაღით.

"დარწმუნებული ვარ, პერიოდულად ხედავთ მედიაში, უკრაინულსა და დასავლურში, შეტყობინებებს იმის შესახებ, თუ რამდენ ხანს შეიძლება, გაგრძელდეს ეს ომი.

ზოგი ამბობს რამდენიმე კვირას;

ზოგი რამდენიმე წელს.

აუცილებელია, გავითვალისწინოთ რუსეთზე გავლენის მქონე ინსტრუმენტების ეფექტურობა, რომელსაც იყენებს უკრაინა და მთელი ჩვენი ანტისაომარი კოალიცია რუსული აგრესიის წინააღმდეგ.

მე ყოველთვის ვეუბნები ყველა ჩვენს პარტნიორს, ვისთანაც ამ საკითხს განვიხილავ, რომ მშვიდობა პირდაპირ იქნება დამოკიდებული უკრაინის მხარდაჭერის ოდენობაზე.

თუ ვინმე მეუბნება: ერთი წელი ან წლები, მე ვპასუხობ: შენს ხელშია, ომი გაცილებით ხანმოკლედ აქციო.

რაც უფრო მეტს და სწრაფად მივიღებთ ყველა იმ იარაღს, რომელიც მოვითხოვეთ, მით უფრო გაძლიერდება ჩვენი პოზიციები და უფრო მალე დამყარდება მშვიდობა;

რაც უფრო მეტს და მალე მივიღებთ მოთხოვნილ ფინანსურ მხარდაჭერას, მით უფრო მალე იქნება მშვიდობა;

რაც უფრო მალე აღიარებს დემოკრატიული სამყარო, რომ რუსეთის წინააღმდეგ ნავთობის ემბარგო და მისი საბანკო სექტორის სრული ბლოკადა არის არსებითი ნაბიჯი მშვიდობისკენ, მით უფრო მალე დასრულდება ომი.

ზოგადად, დემოკრატიულმა სამყარომ უნდა გადაწყვიტოს, რომ რუსეთისთვის ფულის გადახდა ენერგორესურსებისთვის არის ნამდვილად ფულის გადახდა დემოკრატიის განადგურებისთვის“, – განაცხადა უკრაინის პრეზიდენტმა.

ზელენსკის ინფორმაციით, უკრაინელმა სამხედროებმა ოკუპანტებისგან გაათავისუფლეს კიდევ ერთი სოფელი და ამ დრომდე იქ შესაბამისი სამსახურები დანაღმული ტერიტორიების გაწმენდას განაგრძობენ.

ასევე დაგაინტერესებთ:

📍რომში, იტალიელი სტუდენტებისთვის საქართველოს ისტორიისა და კულტურის გაცნობის მიზნით, ღონისძიება ჩატარდა

📍დაიღუპა შვიდი ადამიანი, მათ შორის შვიდი თვის ბავშვი - რუსმა ოკუპანტებმა ხარკოვის ერთ-ერთი საცხოვრებელი უბანი დაბომბეს