ზელენსკის მიმართვა უკრაინელებს: ჩემო ძვირფასებო, დადგება დრო, როცა კარგად გამოვიძინებთ - მაგრამ ეს იქნება ომის შემდეგ, როდესაც გავიმარჯვებთ

უკრაინის პრეზიდენტმა ვოლოდიმირ ზელენსკიმ უკრაინელ ხალხს ომის დაწყებიდან მე-7 დღეს ყოველდღიურ ბრიფინგზე მიმართა და გასული ღამის შედეგები გააცნო.

ქვეყნის პრეზიდენტმა უკრაინელები გაამხნევა და განაცხადა, რომ ეს ომი უკრაინის გამარჯვებით დასრულდება.

"რა არის შედეგი რუსეთისთვის? ამ სახელმწიფოს დროშა სპორტულ ტურნირებზე აღარ იქნება. თანამედროვე მსოფლიო კულტურა მათთვის დაიხურება.

რუსული საქონელი მთელ მსოფლიოში მაღაზიების თაროებიდან ამოღებულია.

რუსული ბანკები გათიშულია გლობალურ სისტემასთან.

რუსეთის მოქალაქეები კარგავენ დანაზოგებს, კარგავენ ყველა პერსპექტივას.

რუსი დედები შვილებს კარგავენ მათთვის სრულიად უცხო ქვეყანაში.

იფიქრეთ ამ რიცხვზე: დაახლოებით ექვსი ათასი დაღუპული რუსი. რუსი სამხედროები. ექვსდღიანი ომის შემდეგ და ეს წუხანდელი მსხვერპლის გარეშე. ექვსი ათასი და რისთვის, რაღაცის მისაღებად? მიიღეთ უკრაინა? ეს შეუძლებელია.

ამის შეცვლა რაკეტებით, ტანკებით, ბომბებით შეუძლებელია.

ჩვენ ჩვენს მშობლიურ მიწაზე ვართ და ჩვენ წინააღმდეგ ომისთვის იქნება საერთაშორისო ტრიბუნალი.

უკრაინელებო! ჩვენ წინააღმდეგ, ხალხის წინააღმდეგ ომის კიდევ ერთი ღამე გავიდა. მძიმე ღამე. ვიღაცამ ის ღამე მეტროში გაატარა – თავშესაფარში. ვიღაც სარდაფშია. ვისაც უფრო გაუმართლა სახლში ეძინა.

 შვიდი ღამეა არ გვძინავს.

ან გვძინავს, მაგრამ ძალიან ვშფოთავთ.

ჩემო ძვირფასებო, დადგება დრო, როცა კარგად გამოვიძინებთ.

მაგრამ ეს იქნება ომის შემდეგ,  გამარჯვების შემდეგ იმ მსოფლიოში, რომელიც ჩვენ გვჭირდება, რომელსაც ჩვენ ყოველთვის ვაფასებდით და რომლის მშვიდობა ჩვენ არასდროს დაგვირღვევია.

ყველას გთხოვთ, იზრუნოთ თქვენს საყვარელ ადამიანებზე. იზრუნეთ თქვენს ძმებზე. აღფრთოვანებული ვარ თქვენით!

მთელი მსოფლიო თქვენ გიყურებთ.

ჰოლივუდის ვარსკვლავებიდან პოლიტიკოსებამდე.

დღეს თქვენ, უკრაინელები, უძლეველობის სიმბოლო ხართ.

სიმბოლო იმისა, რომ ნებისმიერ ქვეყანაში ნებისმიერ მომენტში ადამიანი შეიძლება გახდეს საუკეთესო ხალხი დედამიწაზე.

დიდება უკრაინას!"- განაცხადა ბრიფინგზე ზელენსკიმ.

ამავე თემაზე სხვა სიახლეები:

🔲 " დაუყოვნებლივ უნდა შეწყდეს ცეცხლი - არც ერთმა ბავშვმა არ უნდა იცოდეს ძალადობისა და კონფლიქტის სისასტიკე" - პენელოპა კრუზი უკრაინას სოლიდარობას უცხადებს

🔲 “ეს არის დავითისა და გოლიათის ბრძოლა და რუსეთს ისევე შეენგრევა საფეთქელი და დავარდება მიწაზე უსულოდ, როგორც გოლიათი” - რამაზ გიგაური

🔲 ომი უკრაინაში - დღე მეექვსე (მიმოხილვა)

🔲 რუსმა ოკუპანტებმა უკრაინაში ქალაქ ხერსონის რკინიგზის სადგური და მდინარის პორტი დაიკავეს

🔲 "დილა კიევში განგაშის სირენების ჩართვით დაიწყო" - რა ვითარებაა უკრაინაში ომის დაწყებიდან მე-7 დღეს