ირლანდია ევროკავშირის საბჭოს თავმჯდომარე ქვეყანა გახდა

2026 წლის 1-ელ ივლისს ირლანდიამ კვიპროსისგან ევროკავშირის საბჭოს თავმჯდომარეობა გადაიბარა.

ირლანდია ევროკავშირის საბჭოს თავმჯდომარე ქვეყანა მომდევნო ექვსი თვის განმავლობაში, 2027 წლის 1-ელ იანვრამდე იქნება.

„ჩვენ ვალდებულნი ვართ, კარგად შევასრულოთ ჩვენი საქმე ევროკავშირისა და მისი მოქალაქეებისთვის და ჩვენი ვადის განმავლობაში ვიმუშავებთ, რათა კავშირი უფრო აყვავებული და უსაფრთხო გავხადოთ და დავიცვათ ჩვენი საერთო, ფუნდამენტური ღირებულებები“, - განაცხადა ირლანდიის პრემიერ-მინისტრმა მიხაელ მარტინმა.

თავისი თავმჯდომარეობის დროს ირლანდია იღებს ვალდებულებას, იმუშაოს „ერთიანი ევროპის, ერთიანი ბაზრის საგზაო რუკის“ განხორციელების მიმართულებით, რომელიც განსაზღვრავს ნაბიჯებს, რომლებიც ევროკავშირმა სასწრაფოდ უნდა გადადგას ისეთ სფეროებში, როგორებიცაა: ბიზნესისა და მოქალაქეებისთვის რეგულაციების გამარტივება, ერთიანი ბაზრის გაღრმავება, სამართლიანი და ღია ვაჭრობის დაცვა, ენერგიის ფასების შემცირება და ეკონომიკის დეკარბონიზაცია, ასევე, ხელოვნური ინტელექტისა და ციფრული ტრანსფორმაციის ხელშეწყობა ყველას სასარგებლოდ.

„ეს ირლანდიის თავმჯდომარეობისთვის ნამდვილი პრიორიტეტი იქნება და ჩვენ მჭიდროდ ვითანამშრომლებთ წევრ სახელმწიფოებთან, ევროპარლამენტთან და ევროკომისიასთან, რათა მივაღწიოთ რაც შეიძლება მეტ პროგრესს“, - დასძინა მარტინმა.

მან ასევე აღნიშნა, რომ ირლანდიის თავმჯდომარეობის დროს ევროკავშირი უკრაინისთვის ურყევი მხარდაჭერის გაწევას გააგრძელებს.

ირლანდია ასევე იღებს ვალდებულებას, მხარი დაუჭიროს იმ ქვეყნებს, რომლებსაც სურთ ევროკავშირში გაწევრიანება, ევროინტეგრაციის გზაზე წინსვლა, რაც ხელს შეუწყობს რეგიონში მეტი კეთილდღეობისა და სტაბილურობის უზრუნველყოფას.