WSJ: დონალდ ტრამპმა ირანთან სრულმასშტაბიან ომში დაბრუნება განიხილა, თუმცა საბოლოოდ მოლაპარაკებების გაგრძელება გადაწყვიტა

აშშ-ის პრეზიდენტმა დონალდ ტრამპმა ირანთან სრულმასშტაბიან ომში დაბრუნება განიხილა, ბოლო დღეებში თავდაცვის მდივან პიტ ჰეგსეთთან და გაერთიანებული შტაბების თავმჯდომარესთან, გენერალ დენ კეინთან ახალი დარტყმების შესახებ საუბრები გამართა, თუმცა საბოლოოდ მოლაპარაკებების გაგრძელება გადაწყვიტა. ამის შესახებ The Wall Street Journal-ს ამერიკელმა ოფიციალურმა პირებმა განუცხადეს.

როგორც გამოცემის წყაროებმა აღნიშნეს, დისკუსიები ფოკუსირებული იყო იმაზე, უნდა შეეწყვიტა, თუ არა აშშ-ს მოლაპარაკებები და განეახლებინა სრულმასშტაბიანი თავდასხმები ირანზე - ნაბიჯი, რომელსაც ზოგიერთი მათგანი აღწერს, როგორც „საქმის ბოლომდე მიყვანას“.

გამოცემის ცნობით, დიპლომატიურმა ჩიხმა ტრამპი აიძულა, ალტერნატიული ქმედებები განეხილა და ახალი იდეებისთვის თავის თანაშემწეებს მიმართა. ჰეგსეთმა და კეინმა შესთავაზეს ირანის სამხედრო ობიექტებზე მასშტაბური ავიაიერიშების განახლების ვარიანტები, აცხადებენ წყაროები.

მიუხედავად იმისა, რომ საბოლოო გადაწყვეტილება ჯერ არ არის მიღებული, ტრამპმა თანაშემწეებს განუცხადა, რომ, მისი აზრით, სრულმასშტაბიანი თავდასხმების კიდევ ერთმა რაუნდმა შესაძლოა, ჩაშალოს დიპლომატიური ძალისხმევა და შეამციროს ვაშინგტონის შანსები, საბოლოოდ დაასრულოს ირანის ბირთვული პროგრამა.

ოფიციალური პირების თქმით, ტრამპმა თანაშემწეებს ასევე განუცხადა, რომ ის პრობლემას ვერ ხედავს, გააგრძელოს თეირანთან მოლაპარაკებები, ბირთვული შეთანხმებისთვის 18 აგვისტოს დადგენილი ვადის გასვლის შემდეგაც კი.

ამასთან, პრეზიდენტმა განაცხადა, რომ ამ ეტაპზე კმაყოფილია იმით, რომ ირანის წინააღმდეგ ერთჯერადი დარტყმების განხორციელების განკარგულება გასცა, როდესაც მან დაარღვია „ურთიერთგაგების მემორანდუმი“, რის გამოც გასულ შაბათ-კვირის მხარეებს შორის საომარი მოქმედებები განახლდა.

როგორც გამოცემა წერს, ბოლო დროს პენტაგონში გამართული დისკუსიები მიუთითებს, რომ ტრამპი თეირანთან ურთიერთობებში არსებული ჩიხიდან გამოსავალს ეძებს და საომარი მოქმედებების განახლებას ჯერჯერობით არ გამორიცხავს. ზოგიერთი ოფიციალური პირი აღიარებს, რომ კონფლიქტის განახლება ირანთან ფართოდ რეკლამირებული შეთანხმების ჩავარდნის ჩუმი აღიარება იქნებოდა.

თეთრი სახლის წარმომადგენელმა აღნიშნა, რომ ტრამპი ყოველთვის დიპლომატიას ანიჭებს უპირატესობას და რომ ირანელებისთვის გონივრული იქნება, თუ შეერთებულ შტატებთან ხელსაყრელ შეთანხმებას მიაღწევენ.