კალასის თქმით, აშშ-ისთვის ევროპა პრიორიტეტული აღარ არის, ამიტომ ევროკავშირმა საკუთარი უსაფრთხოება თავად უნდა უზრუნველყოს

ევროპა აღარ არის აშშ-ის საგარეო და თავდაცვის პოლიტიკის პრიორიტეტი, ამიტომ ევროკავშირი უფრო აქტიური უნდა გახდეს საკუთარი თავდაცვის სფეროში. ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში კაია კალასმა ბრიუსელში ევროპის თავდაცვის სააგენტოს კონფერენციაზე განაცხადა.

მისი თქმით, აშშ-ისთვის ევროპა პრიორიტეტული აღარ არის, ამიტომ ევროკავშირმა საკუთარი უსაფრთხოება თავად უნდა ააშენოს.

„ნება მომეცით, ძალიან მკაფიოდ განვაცხადო. ჩვენ ვისწრაფვით ძლიერი ტრანსატლანტიკური კავშირებისკენ. შეერთებული შტატები ევროპის პარტნიორად და მოკავშირედ დარჩება. თუმცა ევროპა ახალ რეალობას უნდა მოერგოს: ევროპა ვაშინგტონის მთავარი მიზიდულობის ცენტრი აღარ არის“, - განაცხადა კალასმა.

მან ისაუბრა ატლანტის ოკეანის მეორე მხარეს „ფუნდამენტურ რეორიენტაციაზე“, რამაც „ტრანსატლანტიკური ურთიერთობები საფუძვლებამდე შეარყია“.

„ეს ცვლილება უკვე გარკვეული ხანია, მიმდინარეობს. ის სტრუქტურულია და არა დროებითი. ეს ნიშნავს, რომ ევროპამ წინ უნდა წაიწიოს. ისტორიაში არ არსებობს ფაქტი, როდესაც ძლიერმა ძალამ საკუთარი თავდაცვა სხვა ქვეყანას გადასცა და გადარჩა“, - ხაზგასმით აღნიშნა ევროკავშირის უმაღლესმა დიპლომატმა.