Reuters: გერმანიაში აღმავლობის გზაზე მყოფი „ალტერნატივა გერმანიისთვის“ ტრამპის ადმინისტრაციასთან კავშირებს აძლიერებს

გერმანული პარტია „ალტერნატივა გერმანიისთვის“ (AfD) მხარდაჭერას ეძებს ვაშინგტონში და იყენებს კავშირებს მოძრაობა MAGA-ს წარმომადგენლებთან, რომლებიც ტრამპის ადმინისტრაციაში მაღალ თანამდებობებზე დაწინაურდნენ, - წერს საინფორმაციო სააგენტო Reuters-ი სტატიაში სათაურით გერმანიაში აღმავლობის გზაზე მყოფი „ალტერნატივა გერმანიისთვის“ აძლიერებს კავშირებს ტრამპის ადმინისტრაციასთან.

„გერმანიის შიდა უსაფრთხოების სამსახურის მიერ „ექსტრემისტულად“ კლასიფიცირებული და „მეინსტრიმული“ პარტიებისგან გარიყული „ალტერნატივა გერმანიისთვის“ ბოლო თვეებში შეხვედრებს მართავდა აშშ-ის სახელმწიფო დეპარტამენტის მაღალჩინოსნებთან“, - ნათქვამია სტატიაში.

ეს კონტაქტები ასახავს AfD-სა და ტრამპის MAGA (Make America Great Again) მოძრაობის ნაწილებს შორის მზარდ თანხვედრას. ამერიკულმა მოძრაობამ მხარდაჭერა გამოუცხადა AfD-ის პრეტენზიებს საკუთარ ქვეყანაში არსებული პოლიტიკური რეპრესიების შესახებ, ასევე მის მკაცრ პოზიციას მიგრაციის საკითხებზე.

მანჰეტენზე გამართული კერძო მიღება, რომელსაც ნიუ-იორკის ახალგაზრდა რესპუბლიკელთა კლუბმა უმასპინძლა, ხაზს უსვამს AfD-ის მცდელობას, მოიპოვოს საერთაშორისო ლეგიტიმაცია და წინააღმდეგობა გაუწიოს იმას, რასაც პარტია საკუთარ ქვეყანაში არადემოკრატიულ გარიყვას უწოდებს.

„AfD-ის მზარდი კავშირები ვაშინგტონში იმ ფონზე ყალიბდება, როდესაც პარტიის რეიტინგი მკვეთრად იზრდება გერმანიის საზოგადოებრივი აზრის გამოკითხვებში“, - აღნიშნულია სტატიაში.

AfD-ის პოლიტიკოსმა, იოახიმ პაულმა განაცხადა, რომ სახელმწიფო დეპარტამენტმა მიიწვია, რათა „განემარტა გერმანიაში ოპოზიციის მდგომარეობა“ მას შემდეგ, რაც მას მერობის კანდიდატად კენჭისყრა აეკრძალა. გერმანიის ხელისუფლებამ ამის მიზეზად ქვეყნის კონსტიტუციური წესრიგისადმი მისი ლოიალობის შესახებ არსებული ეჭვები დაასახელა.