ანდრია ჯაღმაიძე: ეკლესიის გაფართოებული კრება, რომელზეც პატრიარქს აირჩევენ, ნაწილობრივ გაშუქდება ტელევიზიით, პირველი არხის საშუალებით, საბოლოო შედეგი პირდაპირ ეთერში გამოცხადდება

საპატრიარქოს საზოგადოებასთან ურთიერთობის სამსახურის ხელმძღვანელმა ანდრია ჯაღმაიძემ მედიას, 11 მაისს ჩანიშნული საქართველოს მართლმადიდებელი ეკლესიის გაფართოებული კრების დღის წესრიგი და ღონისძიების დეტალები გააცნო.

ანდრია ჯაღმაიძის თქმით, 10:00 საათიდან 12:00 საათამდე მოხდება სტუმრების და დელეგატების მიღება.

მისივე განმარტებით, ღონისძიება ტელევიზიით ნაწილობრივ გაშუქდება, კერძოდ, პირდაპირ ეთერში იქნება საეკლესიო კრების გახსნა, კენჭისყრის პროცესი, ხმების დათვლა აღარ გადაიცემა მედიის საშუალებით, ხოლო საბოლოო შედეგის გამოცხადება მოხდება პირდაპირ ეთერში.

„მოგეხსენებათ, მართვა-გამგეობის დებულების შესაბამისად, ხვალ ჩანიშნულია გაფართოებული კრება, ნომრით მე-14. ამ კრებაზე იქნება კენჭისყრა სამი საპატრიარქო კანდიდატიდან ერთ-ერთის შესარჩევად. ხვალ საქართველოს ეკლესიას ეყოლება ახალი კათოლიკოს-პატრიარქი და ეს არის ძალიან მნიშვნელოვანი მოვლენა. საორგანიზაციო საკითხთან დაკავშირებით დეტალები ნაწილობრივ ცნობილია საზოგადოებისთვის, თუმცა დავაზუსტებთ, რომ სამების ტაძარში კრებაზე დასწრება შესაძლებელია მხოლოდ სპეციალური სიებით, რომელიც არის შედგენილი ბოლო პერიოდის განმავლობაში, ესეც არის მართვა-გამგეობის დებულების მიხედვით დარეგულირებული. ეპარქიებიდან და მცხეთა-თბილისის ეპარქიიდან შედგენილია სია იმის მიხედვით, როგორ არის გაწერილი მართვა-გამგეობის დებულებაში.

მომსვლელებს თან უნდა ჰქონდეთ პირადობის მოწმობა, ამით მოხდება იდენტიფიცირება სიასთან. შესვლა შესაძლებელი იქნება 10:00 საათიდან 12:00 საათამდე – უნდა მოხდეს სტუმრების, დელეგატების მიღება. ამ პერიოდისთვის უკვე მღვდელმთავრებიც მობრძანდებიან საკათედრო ტაძარში და დაიწყება მზადება კენჭისყრისთვის. მკაცრად იზღუდება მობილური ტელეფონებით სარგებლობა. ნაწილობრივ გაშუქებული იქნება ეს ღონისძიება ტელევიზიით, პირველი არხის საშუალებით. ნაწილობრივ იქნება გაშუქებული, რადგან ნაწილი ამ სხდომისა უნდა იყოს დახურული. უკვე დასრულების შემდეგ, თუ ჩავთვლით საჭიროდ და იქნება ამის აუცილებლობა, ჩვენ თვითონ გავავრცელებთ საჭირო ინფორმაციას და კადრებს.

კრების გახსნა იქნება პირდაპირ ეთერში, შემდეგ კენჭისყრის პროცესი იქნება პირდაპირ ეთერში, ხოლო უკვე დათვლა აღარ გადაიცემა, საბოლოო შედეგის გამოცხადებაც გადაიცემა პირდაპირ ეთერში. ასეთია ხვალინდელი დღის წესრიგი. მანქანებით მისვლა იზღუდება და შესაბამისად, განცხადება გაკეთდა უკვე. ფეხით მისვლა შესაძლებელი იქნება ახვლედიანის ქუჩიდან და მეტრო „ავლაბრიდან“ იმ აღმართზე, რომელიც მიდის საკათედრო ტაძარში. ეზოში შემოსვლა, ეზოში დასწრება შეუძლია ნებისმიერ მსურველს, შეზღუდვა ეხება შიგნით ტაძარს“, - აღნიშნა ანდრია ჯაღმაიძემ.

შეგახსენებთ, 28 აპრილს საპატრიარქოში გამართულ წმინდა სინოდის სხდომაზე სინოდის წევრებმა პატრიარქობის სამი კანდიდატი შეარჩიეს.

პატრიარქობის კანდიდატები არიან: კათოლიკოს-პატრიარქის ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი), მროველ-ურბნელი მიტროპოლიტი იობი (აქიაშვილი), ფოთისა და ხობის მიტროპოლიტი გრიგოლი (ბერბიჭაშვილი).

საპატრიარქო ტახტის მოსაყდრე შიომ მიიღო 20 ხმა, დანარჩენმა ორმა კანდიდატმა – 7-7 ხმა.

სამი მღვდელმთავარი, რომელმაც სინოდზე ხმათა უმრავლესობა მიიღო, კენჭს იყრის გაფართოებულ კრებაზე, როგორც პატრიარქობის კანდიდატი.

ვერცერთი კანდიდატი თუ ვერ მიიღებს ხმათა ნახევარზე მეტს, ტარდება ხელმეორე კენჭისყრა. მასში მონაწილეობას მიიღებს ის ორი კანდიდატი, რომელიც პირველ კენჭისყრაში მიიღებს ხმათა უმრავლესობას.

კათოლიკოს-პატრიარქის არჩევის კენჭისყრაში მონაწილეობენ მხოლოდ მღვდელმთავრები. სრულიად საქართველოს კათოლიკოს-პატრიარქად არჩეულად ჩაითვლება ის კანდიდატი, რომელიც მიიღებს კრების მონაწილე მღვდელმთავართა ხმების ნახევარზე მეტს.

საქართველოს კათოლიკოს-პატრიარქის არჩევის წესი განსაზღვრულია საქართველოს ეკლესიის მართვა-გამგეობის დებულებით, რომელიც 1995 წლის 18-19 სექტემბერს სვეტიცხოვლის ტაძარში გამართულ საქართველოს ეკლესიის გაფართოებულ მე-13 კრებაზე მიიღეს.