ბექა ძამაშვილი: სტრასბურგის სასამართლოს გადაწყვეტილებებში კიდევ ერთხელ ყურადღება გამახვილებულია საქართველოს ხელისუფლების მიერ, 2012 წლის შემდეგ მართლმსაჯულების სისტემაში განხორციელებულ წარმატებულ რეფორმებთან დაკავშირებით

 სტრასბურგის სასამართლომ საქართველოს უზენაესი სასამართლოს მოსამართლეების დამოუკიდებლობისა და მიუკერძოებლობის საკითხზე შეტანილი საჩივრები დაუშვებლად გამოაცხადა. იუსტიციის მინისტრის მოადგილე ბექა ძამაშვილის თქმით, სტრასბურგის სასამართლოს გადაწყვეტილებებში კიდევ ერთხელ ყურადღება გამახვილებულია საქართველოს ხელისუფლების მიერ 2012 წლის შემდეგ მართლმსაჯულების სისტემაში განხორციელებულ წარმატებულ რეფორმებთან დაკავშირებით.

„გადაწყვეტილებები შეეხება სამ საჩივარს, სადაც მომჩივნები დაობდნენ, თითქოს მათ მიმართ წარმოებულ საქმეებში უზენაესი სასამართლოს ერთ-ერთი მოსამართლე არ იყო მიუკერძოებელი და დამოუკიდებელი. თუმცა, ევროპულმა სასამართლომ სრულად გაიზიარა იუსტიციის სამინისტროს მიერ წარდგენილი მტკიცებულებები და არგუმენტები და სამივე საჩივარი დაუშვებლად გამოაცხადა. ევროპულმა სასამართლომ ყურადღება გაამახვილა ისეთ საკითხებზე, როგორიცაა მოსამართლეების უვადო წესით გამწესება, იუსტიციის უმაღლესი საბჭოს ინსტიტუციური და ფუნქციონალური გაძლიერება, მოსამართლეთა დანიშვნისა და დაწინაურების პროცედურების დახვეწა და კონსტიტუციური ცვლილება, რომლის მეშვეობითაც უფრო გამჭვირვალე და თანამედროვე გახდა უზენაესი სასამართლოს მოსამართლეების თანამდებობაზე გამწესების წესი. ერთ-ერთი საჩივარი - „ფირცხალავა საქართველოს წინააღმდეგ“, შეეხებოდა საზოგადოებისთვის ცნობილ საქმეს, ბუტა რობაქიძის მკვლელობის საქმეს. ამ საქმეში მომჩივანი დაობდა, თითქოს მის წინააღმდეგ წარმოებული სისხლის სამართლის საქმე იყო მის მიმართ უსამართლო, რადგან მას არ მიეცა შესაძლებლობა დაეკითხა მოწმეები. თუმცა, ამ საკითხზეც ევროპულმა სასამართლომ სრულად გაიზიარა იუსტიციის სამინისტროს პოზიცია და მიიჩნია, რომ ეს პრეტენზია იყო იმდენად დაუსაბუთებელი, რომ არსებით განხილვას არც კი საჭიროებდა“, - განაცხადა იუსტიციის მინისტრის მოადგილე ბექა ძამაშვილმა.