დონალდ ტრამპმა და ვლადიმერ პუტინმა სატელეფონო საუბარი გამართეს

აშშ-ის პრეზიდენტმა დონალდ ტრამპმა რუსეთის პრეზიდენტ ვლადიმერ პუტინთან სატელეფონო საუბარი გამართა. რუსეთის ლიდერმა ტრამპს აშშ-ის დამოუკიდებლობის დღე მიულოცა და მხარეებმა უკრაინაში მიმდინარე ომიც განიხილეს. ამის შესახებ პუტინის თანაშემწემ იური უშაკოვმა განაცხადა.

უშაკოვის თქმით, საუბარი 1 საათსა და 25 წუთს გაგრძელდა და „შეერთებული შტატების ინიციატივით“ გაიმართა.

მან საუბარს „საქმიანი და ძალიან კონსტრუქციული“ უწოდა და აღნიშნა, რომ ტრამპმა მზადყოფნა გამოთქვა, ხელი შეუწყოს ომის დასრულების მიზნით მშვიდობიანი გადაწყვეტილებების ძიებას.

„ამერიკის პრეზიდენტმა კიდევ ერთხელ დაადასტურა მზადყოფნა, იმუშაოს საომარი მოქმედებების სწრაფად დასრულებისა და კრიზისის დასაძლევად გადაწყვეტილებების ძიებაზე“, - განაცხადა უშაკოვმა.

ამავდროულად, უშაკოვმა აღნიშნა, რომ რუსეთი „კონფლიქტის დიპლომატიურ გადაწყვეტისკენ ისწრაფვის“, თუმცა საკუთარი მოთხოვნების გათვალისწინებით.

მან ასევე თქვა, რომ პუტინმა ტრამპს უამბო „ბრძოლის ველზე არსებული რეალური ვითარების“ შესახებ, სადაც, კრემლის ლიდერის თქმით, რუსი ჯარები თავდაჯერებულად მიიწევენ წინ.

მან ასევე განაცხადა, რომ დონალდ ტრამპის სპეციალური წარმომადგენლები, სტივ უიტკოფი და ჯარედ კუშნერი, კონფლიქტის მოგვარების მცდელობებს გააგრძელებენ და მზად არიან, მოსკოვს კიდევ ერთხელ ეწვიონ.

უშაკოვმა ასევე განაცხადა, რომ პუტინმა ტრამპს მოსკოვში ვიზიტის შესახებ ღია მიწვევა შეახსენა.