ირაკლი ჭეიშვილი: კანონმდებლობის გაუქმებას ვერ გვაიძულებენ, შეუვალები ვიქნებით, როცა კანონები ჩვენს ღირებულებებსა და ტრადიციებს ეხება

„ანდრია ჯაღმაიძემ რაზეც ისაუბრა, ამაზე ჩვენც გვესაუბრებოდნენ. ვიცით, საბოლოოდ, რა მოთხოვნები ექნებათ, სად და რაზე დგას დღეს ევროპა“, - ამის შესახებ საპარლამენტო უმრავლესობის წევრმა ირაკლი ჭეიშვილმა განაცხადა.

მისი თქმით, ხელისუფლება და ხალხი წყვეტს, როგორ განვითარდეს ქვეყანა.

„ჩვენთვის ანდრია ჯაღმაიძის განცხადება ახალი არ ყოფილა, რადგან ჩვენ მიმართ მსგავსი მოთხოვნები წლების განმავლობაში ჰქონდათ. ეკლესიასაც რომ მოუსინჯავდნენ პირს, უკვე სასულიერო პირები და საპატრიარქო საუბრობენ. ამ პროცესს რომ მიჰყვეთ, ბევრ სურათს დაინახავთ. დიდი პროცესები მიმდინარეობს. ამ ყველაფერს გუშინ ფარდა აეხადა. წლებია, ვსაუბრობთ, ევროპაში ჩვენ მიმართ რა მოთხოვნები აქვთ. ამ ყველაფრის ფინალი რა არის? – ჯერ საუბარი დაიწყეს „გამჭვირვალობის“, შემდეგ „ოჯახური ღირებულებების შესახებ“ კანონით.

უკურეაქციები ჰქონდათ, როცა კანონმდებლობას ვამკაცრებდით და გვინდოდა, ქვეყანა სწორ გზაზე დამდგარიყო. მაშინ ევროპელი პარტნიორების მხრიდან მხოლოდ ხელშეშლას ვხედავდით. ჯაღმაიძემ რაზეც ისაუბრა, ამაზე ჩვენც გვესაუბრებოდნენ. რატომ ებრძვიან „ოჯახური ღირებულებების შესახებ“ კანონს და მის გაუქმებას ითხოვენ? შეტევაა და მოთხოვნაა, რომ ეს კანონი გაუქმდეს.

ვიცით, საბოლოოდ რა მოთხოვნები ექნებათ, სად და რაზე დგას დღეს ევროპა. წლების წინ სხვა ტრადიციებსა და იდეალებზე იდგა. ხელისუფლება და ხალხი წყვეტს, როგორ განვითარდეს ქვეყანა. კანონმდებლობის გაუქმებას ვერ გვაიძულებენ, შეუვალები ვიქნებით, როცა კანონები ჩვენს ღირებულებებსა და ტრადიციებს ეხება“, - აღნიშნა ირაკლი ჭეიშვილმა.

ცნობისთვის, საპატრიარქოს საზოგადოებასთან ურთიერთობის სამსახურის ხელმძღვანელმა, ანდრია ჯაღმაიძემ „იმედის კვირისთვის“ მიცემულ ინტერვიუში განაცხადა: „2023 წელს ბელგიის საგარეო საქმეთა მინისტრმა გვთხოვა, ერთნაირსქესიანთა ქორწინებების პოპულარიზაციაში დავხმარებოდით, მიიჩნევდა, რომ ქართული საზოგადოება ტენდენციებს ჩამორჩა“. ამავე ინტერვიუში ჯაღმაიძემ, ასევე, განაცხადა: „2019 წელს კონფერენციაზე მიხაელ როთს ვკითხე, იქნება თუ არა მოთხოვნა საქართველოს წინაშე, რომ პრაიდები და ა.შ. განხორციელდეს, მან გვითხრა, ჩვენი ფუნდამენტური ღირებულებები ეს არისო“.