კახა კალაძე: ნუ გექნებათ იმის მოლოდინი, რომ ევროკავშირის რომელიმე ელჩი გამოვა, დაგმობს ან რაიმე ტიპის განცხადებას გააკეთებს აქციის დაშლაზე

თბილისის მერი კახა კალაძე მიიჩნევს, რომ ევროკავშირის წევრი ქვეყნების ელჩები, რომლებიც საქართველოში მიმდინარე ძალადობრივი აქციების დაშლას გმობდნენ, დანიაში განვითარებული მოვლენების შესახებ არანაირ კომენტარს არ გააკეთებენ, რადგან მათ ამის მითითება არ აქვთ. ამის შესახებ მან სხვადასხვა ქვეყანაში აქციების დაშლასა და მათზე რეაგირების ფორმების შეფასებებისას განაცხადა.

„ნუ გაქვთ იმის მოლოდინი, რომ რაიმე რეაგირება ექნებათ ან რაიმე კომენტარს გააკეთებენ. ეს მხოლოდ დანიას არ ეხება. მაგალითად, ბერლინში როდესაც იმართება მიტინგები, გამოსვლები, ვხედავთ, როგორ მოქმედებენ პოლიციელები, როდესაც მათ შეურაცხყოფას მიაყენებენ. ნუ გექნებათ იმის მოლოდინი, რომ ევროკავშირის რომელიმე ელჩი გამოვა, დაგმობს ან რაიმე ტიპის განცხადებას გააკეთებს. მათ ამის უფლება არ აქვთ, რადგან არ არის მითითებები. იმ „დიფ სთეითის“ და არაფორმალური მმართველების გავლენის ქვეშ არიან, რითაც დღეს იმართება მთელი მსოფლიო. მათი წარმომადგენლები არიან და ვიცით, რა გამოწვევების წინაშეც დგას დღეს მსოფლიო. ელჩების მხრიდან საქართველოსთან დაკავშირებით გაკეთებული განცხადებები, რა თქმა უნდა, გარედან წამოსული დავალებებია“, - განაცხადა კახა კალაძემ.

მისივე შეფასებით, ზოგიერთი ქვეყნის წარმომადგენელი დაგმობის ნაცვლად, პირიქით, ახალისებდა საზოგადოებაში სიძულვილისა და პოლარიზაციის გაღრმავებას.

„გახსოვთ, რომელიმე იმ ქვეყნის წარმომადგენელი, ელჩი, რომელიც აქტიურობდა თუნდაც საპარლამენტო არჩევნების ან აქციების დროს, გამოსულიყო და გაეკეთებინა თუნდაც ერთი განცხადება, რომლითაც მომიტინგეების ქმედებებს დაგმობდნენ? ვიხილეთ, როგორ ესროდნენ პოლიციელებს „მოლოტოვის კოქტეილებს“, ქვებს, აყენებდნენ შეურაცხყოფას. არ მახსოვს ერთი განცხადება გაკეთებულიყო და რომელიმეს დაეგმო აღნიშნული ქმედებები. პირიქით, ახალისებდნენ, ხელს უწყობდნენ, რომ პოლარიზაცია გაღრმავებულიყო; საზოგადოება ერთმანეთს დაუპირისპირდეს, რევოლუციური სცენარი განხორციელდეს ქვეყანაში. რა თქმა უნდა, მათი ჩართულობით, უშუალო თანამონაწილეობით იმართებოდა ის პროცესები, რომლებიც ვითარდებოდა საქართველოში“, - აღნიშნა თბილისის მერმა.