ლევან მაჭავარიანი ევროკომისიის კვლევაზე: ნებისმიერ ინდექსში, რომელიც ეხება დემოკრატიის ხარისხს, ჩვენ ვართ მოწინავე პოზიციაზე და ეს არის რეალობა

პარლამენტის ფრაქცია „ქართული ოცნების“ თავმჯდომარის პირველი მოადგილის ლევან მაჭავარიანის განცხადებით, ახალი ინდექსი კიდევ ერთხელ ადასტურებს საქართველოში დემოკრატიის მაღალ ხარისხს, ოპონენტებისა და ევრობიუროკრატების კრიტიკა კი რეალობას აცდენილია.

„ეს კიდევ ერთხელ მეტყველებს, თუ რა აბსურდთან გვაქვს საქმე, როდესაც ევრობიუროკრატები აბრალებენ საქართველოსა და ჩვენს ხელისუფლებას ჰაერიდან მოტანილ, აღქმებზე დაფუძნებულ ბრალდებებს, რეალობა კი აბსოლუტურად სხვაა. ნებისმიერ ინდექსში, ნებისმიერ კვლევაში, რომელიც ეხება დემოკრატიის ხარისხს, ჩვენ ვართ მოწინავე პოზიციაზე. ეს არის რეალობა და ჩვენ გვესმის მხოლოდ ბრალდებები, ისეთი აბსურდი, თითქოს საქართველო არ არის შუა დერეფნის მონაწილე ქვეყანა, თითქოს საქართველო არ ესაზღვრება შავ ზღვას - მსგავსი აბსურდები. ეს ყველაფერი დაიწყო ზუსტად იმ დღიდან, რა დღესაც დაიწყო უკრაინაში რუსეთის აგრესია და ჩვენ უარი განვაცხადეთ საქართველოს პროქსი ქვეყნად გამოყენებაზე“, - აცხადებს ლევან მაჭავარიანი.

შეგახსენებთ, მსოფლიო ბანკმა გლობალური მმართველობის ინდიკატორების ფარგლებში ევროკომისიის კვლევის შედეგები გამოაქვეყნა. პროექტ „ევრომონიტორის“ ფარგლებში, ევროპის ორმოცამდე ქვეყანაში საზოგადოებრივი აზრის მასშტაბური გამოკითხვის შედეგად, ნდობის რეიტინგების ინდექსები შემუშავდა. აღსანიშნავია, რომ წინა, ანუ 2024 წლის შეფასებით, საქართველო პარლამენტისადმი ნდობის რეიტინგით ევროპაში მე-16 პოზიციაზე იყო. 2025 წლის პარლამენტის ნდობის ინდექსის მიხედვით, საქართველო უსწრებს ევროკავშირისა და ნატოს წევრ 23 სახელმწიფოს.