ლევან მახაშვილი: ჩვენთვის მთავარი ამოსავალი წერტილი არის, რომ საზოგადოებაში შევუწყოთ ხელი ჯანსაღი დიალოგის კულტურას, როდესაც ერთი ადამიანი მეორე ადამიანს საჯაროდ შეურაცხყოფას აყენებს, ეს მთლიანად საზოგადოებრივ კულტურას არღვევს

„დარწმუნებული ვარ, რომ იქნება ბრჭყალებში კრიტიკული განცხადებები, ეს ორმაგის სტანდარტის ცალსახა გამოვლინებაა რა თქმა უნდა, თუმცა „მგლის შიშით ცხვარი ვის გაუწყვეტიაო“, - განაცხადა გადაცემაში „დღის ქრონიკა“ პარლამენტის ევროპასთან ინტეგრაციის კომიტეტის თავმჯდომარემ ლევან მახაშვილმა.

მისივე თქმით, საქართველოსთვის მთავარი ამოსავალი წერტილი არის არა ის, რომ რომელიმე უცხოური დედაქალაქის კმაყოფილება გამოიწვიოს.

„ჩვენთვის მთავარი ამოსავალი წერტილი არის, რომ საზოგადოებაში მაქსიმალურად შევუწყოთ ხელი ჯანსაღი დიალოგის კულტურას. როდესაც ერთი ადამიანი მეორე ადამიანს საჯაროდ შეურაცხყოფას აყენებს, ეს ერთი პირის პრობლემა კი არ არის, საბოლოო ჯამში ეს მთლიანად საზოგადოებრივ კულტურას არღვევს და შლის საზოგადოებრივ დამოკიდებულებას და ურთიერთპატივისცემას, რაც ძალიან საშიში პროცესია.

დებატებთან ერთად, რომელიც ჩვენი ერთ-ერთი ინიციატივა იყო, არსებულ კანონმდებლობასთან ერთად, რომელიც სხვადასხვა კონტექსტში, ზოგჯერ ევროკავშირთან თანამშრომლობის კონტექსტში, ზოგჯერ მათგან დამოუკიდებლად ავტონომიურად მივიღეთ, საერთო ჯამში ეს გადაწყვეტილებაც სწორედ იმას ემსახურება, რომ იყოს ჯანსაღი, კონსტრუქციული დიალოგის კულტურა საქართველოში და ადამიანებმა ყოველგვარი შეურაცხყოფების გარეშე შეძლონ ერთმანეთთან ურთიერთობა“, - აღნიშნა ლევან მახაშვილმა.

პარლამენტის ევროპასთან ინტეგრაციის კომიტეტის თავმჯდომარის თქმით, მნიშვნელოვანია ის ფაქტი, რომ პირდაპირ სახელმწიფოს, კერძო პირის გარეშე აქვს საშუალება მსგავს ფაქტებზე მოახდინოს სათანადო რეაგირება.

„პროაქტიულობაზე იყო ხაზი გასმული, რომ, არა კერძო პირის მოთხოვნით, არამედ სახელმწიფოს თავად შეეძლოს მსგავს საქმეებზე რეაგირება, ესეც ძალიან მნიშვნელოვანი კომპონენტია, რადგან როდესაც კერძო პირი მიმართავს, აქ უკვე ზიანი დამდგარია, უკვე შემდგარი ფაქტია და ამ დროს, როდესაც ადამიანის ღირსებას შეურაცხყოფ, როდესაც აკნინებ, ამცირებ საჯაროდ, სახელმწიფო თავის რეაგირებას მოახდენს, მაგრამ ზიანის ანაზღაურება სრულყოფილად ვერ ხდება და ნებისმიერ შემთხვევაში ირღვევა უკვე დიალოგის კულტურა.

მაშინ, როდესაც ქვეყანას აქვს შესაძლებლობა, რომ პროაქტიულად მოახდინოს რეაგირება ამა თუ იმ თემაზე, ამით ერთგვარი პრევენციული მექანიზმი შემოდის, რადგან ქვეყანა უკვე ქმნის იმგვარ გარემოს, სადაც ადამიანებს ნაკლები ინტერესი აქვთ, რომ შეურაცხყოფის ტონით ისაუბრონ და მეტი მოტივაცია, რომ მაქსიმალურად კონსტრუქციულად მოახდინონ ურთიერთგაცვლა იდეების“, - განმარტა ლევან მახაშვილმა.

საქართველოს ვიცე-პრემიერის, სახელმწიფო მინისტრის სამართალდამცავი ორგანოების კოორდინაციის საკითხებში მამუკა მდინარაძის ინფორმაციით, შსს-ში შეიქმნება სპეციალური სამმართველო, რომლის ძირითადი ფუნქციაც საჯარო სივრცეში სიძულვილის ენის, შეურაცხმყოფელი კამპანიებისა და აგრესიული კომუნიკაციის სისტემური მონიტორინგი და სამართლებრივი რეაგირება იქნება.