მახაშვილი კონგრესმენ ანა პაულინა ლუნას განცხადებაზე: ჩვენი მოლოდინია, რომ ეს ცივი გეოპოლიტიკური სიო, რომელიც ამერიკიდან უბერავს ევროკავშირს გაგრძელდება

ჩვენი მოლოდინია, რომ ეს ცივი გეოპოლიტიკური სიო, რომელიც ამერიკიდან უბერავს ევროკავშირს გაგრძელდება, - ასე გამოეხმაურა ევროპასთან ინტეგრაციის საპარლამენტო კომიტეტის თავმჯდომარე ლევან მახაშვილი, კონგრესმენ ანა პაულინა ლუნას განცხადებას, რომ „ევროკავშირისგან თავის დაღწევის დროა“.

მისი თქმით, ნათელია, რომ აშშ-ის დამოკიდებულება ევროკავშირის ბიუროკრატიის მიმართ არის კრიტიკული.

„გამოჩნდა არა ერთხელ, რომ ბრიუსელის პოლიტიკა ეწინააღმდეგებოდა არა მხოლოდ ევროპელების ინტერესებს, არამედ ხშირ შემთხვევაში აზიანებდა ამერიკასთან ურთიერთობებსაც. ამიტომ, რა თქმა უნდა ბუნებრივია, რომ ამერიკის დამოკიდებულება ბრიუსელისადმი, ბრიუსელის პოლიტიკისადმი, მათი ნაბიჯებისა და გადაწყვეტილებებისადმი არის კრიტიკული. ჩვენი მოლოდინია, რომ ეს ცივი გეოპოლიტიკური სიო, რომელიც ამერიკიდან უბერავს ევროკავშირს - გაგრძელდება.

პირადად მე ნაკლები მოლოდინი მაქვს, რომ ბრიუსელის ბიუროკრატია შეიცვლის თავის პოზიციებს სწორედ იმიტომ, რომ ეს რეალობაში ნიშნავს იმას, რომ მთლიანად უარი უნდა თქვან თავიანთ არსებულ პრაქტიკაზე. მაგრამ ამერიკის პოლიტიკა გათვლილია იმაზე, რომ არა არსებულ ბიუროკრატიასთან გააღრმაოს ურთიერთობები, არამედ პატრიოტული ძალები გააძლიერონ, რომლებიც ეროვნულ პოლიტიკას მხარს უჭერენ წევრ ქვეყნებში“, - აღნიშნა მახაშვილმა.