ტელეკომპანია "მთავარის" ეკრანიდან მოიხსნება წარწერები - #თავისუფლებამიშას და #თავისუფლებანიკას

ტელეკომპანია "მთავარის" განცხადებით, მათი ეკრანიდან მოიხსნება წარწერები - #თავისუფლებამიშას და #თავისუფლებანიკას, რისი მიზეზიც, ტელეკომპანიის ინფორმაციით, ფინანსური მდგომარეობის გამო საერთაშორისო დონორების მოძიების აუცილებლობაა.

მთავარი არხის ცნობით, გადაწყვეტილება დამფუძნებელთან, ნიკა გვარამიასთან ერთად მიიღეს.

არხის მიერ გავრცელებულ განცხადებას უცვლელად გთავაზობთ:

"თვეების განმავლობაში თქვენ ხედავთ ჩვენს ეკრანზე ორ წარწერას - #თავისუფლებამიშას და #თავისუფლებანიკას.

მთავარი არხის მძიმე ფინანსური მდგომარეობიდან გამომდინარე, ჩვენი ტელევიზიის გადარჩენის ერთადერთი გზა საერთაშორისო დონორების მოძიებაა, რომლებთანაც ჩვენ უკვე ვაწარმოებთ მოლაპარაკებებს.

ამ პროცესში მნიშვნელოვანია, რომ ტელევიზია არ იყოს აფილირებული რომელიმე კონკრეტულ პოლიტიკურ ძალასთან, რის გამოც, არხმა, ნიკა გვარამიასთან შეთანხმებით, მიიღო გადაწყვეტილება, რომ დღეიდან ჩვენი ეკრანიდან ეს ორი წარწერა მოიხსნება.

თუმცა ეს არ ნიშნავს იმას, რომ ჩვენი პოზიცია ამ საკითხთან დაკავშირებით იცვლება - ჩვენ ისევ ვთვლით, რომ საქართველოს მესამე პრეზიდენტი და მთავარი არხის გენერალური დირექტორი პოლიტპატიმრები არიან და ისინი უნდა გათავისუფლდნენ.

დარჩით ჩვენთან და მოიპოვეთ ჩვენთან ერთად თავისუფლება.

მთავარი ხართ თქვენ!," - აღნიშნულია არხის მიერ გავრცელებულ განცხადებაში. 

ასევე დაგაინტერესებთ:

* ივნისში რუსეთიდან საქართველოში 231.44 მლნ აშშ დოლარი გადმოირიცხა

* "მესაზღვრე მეუბნება, რომ პირველად ვნახე ქართველი რომელმაც თავის გადასარჩენად თავისი ქვეყნის მოქალაქე ჩაუშვაო - ამ წამს ჩამოვფრინდი ევროპაში, მექსიკიდან მომაბრუნეს და არა ამერიკიდან"

* "ნაპოლიში კი არა, რეალში რომ ითამაშო, მაგრად მკიდია უკვე" - რას წერს ჟურნალისტი ვახო სანაია ფეხბურთელ ხვიჩა კვარაცხელიაზე