ყაზახეთის აეროპორტში ჩარჩენილი საქართველოს 3 მოქალაქე სასტუმროში გადაჰყავთ - ხუთი კი უსაფრთხო ადგილზეა გადაყვანილი

ყაზახეთის აეროპორტში ჩარჩენილი, საქართველოს სამი მოქალაქე სასტუმროში გადაჰყავთ, ხუთი მოქალაქე კი უსაფრთხო ადგილზეა გადაყვანილი.

ყაზახეთში საქართველოს კონსულის ინფორმაციით, საქართველოს საკონსულოს დახმარებისთვის უკვე მიმართა ქართული ანსამბლის, „ილორის“ ოთხმა წევრმა. საკონსულოს ძალისხმევით, ისინი ყაზახეთის დედაქალაქიდან 30 კილომეტრის მოშორებით, უსაფრთხო ადგილას გადაიყვანეს და ამჟამად მათ სიცოცხლესა და ჯანმრთელობას საფრთხე არ ემუქრება.

ანსამბლის წევრები უზრუნველყოფილნი არიან საკვებითა და საჭირო მედიკამენტებით.

კონსულის განცხადებით, დახმარებისთვის მიმართა ყაზახეთში მცხოვრებმა საქართველოს კიდევ ერთმა მოქალაქემ, რომელიც ამჟამად დასავლეთ ყაზახეთის ქალაქ ატირაუშია გადაყვანილი და მის სიცოცხლეს საფრთხე არ ემუქრება. სასტუმროში გადაჰყავთ ასევე აქთაუს აეროპორტში ჩარჩენილი საქართველოს სამი მოქალაქე. მიმდინარეობს მოლაპარაკება შესაბამის ავიაკომპანიასთან, საქართველოს მოქალაქეების უახლოეს მომავალში სამშობლოში დაბრუნების მიზნით.

საქართველოს საგარეო საქმეთა სამინისტროში აცხადებენ, რომ ყაზახეთში საქართველოს საელჩოში ამოქმედებულია ცხელი ხაზი. ამასთან, საქართველოს მოქალაქეებს საელჩოსთან დაკავშირება ელექტრონული ფოსტის მეშვეობითაც შეუძლიათ.

„ყაზახეთში მიმდინარე პროცესების გათვალისწინებით, საზოგადოებას ვაცნობებთ, რომ ყაზახეთში საქართველოს საელჩო მუშაობას განაგრძობს ჩვეულებრივ რეჟიმში, ამოქმედებულია ცხელი ხაზი და საქართველოს მოქალაქეებს შეუძლიათ, დარეკონ ნომერზე: +7 (717) 224-32-58.

ამასთან, ყაზახეთში ინტერნეტისა და სატელეფონო კავშირის შეფერხებით მუშაობის გამო, თუ მოქალაქეები ცხელ ხაზზე დაკავშირებას ვერ ახერხებენ, მათ შეუძლიათ შეტყობინებები გააგზავნონ ელფოსტის მისამართზე: astana.emb@mfa.gov.ge“, – აცხადებენ საქართველოს საგარეო საქმეთა სამინისტროში.

ცნობისთვის, ყაზახეთში საგანგებო მდგომარეობა გამოცხადდა. არეულობის და შეტაკებების დროს დაიღუპა 8 პოლიციელი და ეროვნული გვარდიის ჯარისკაცი, ხოლო დაშავდა 317.

ასევე საინტერესოა:

🔵 CO-თი ინტოქსიკაციის შედეგად თბილისში ახალგაზრდა ქალი გარდაიცვალა

🔵 შენ ხარ მზე ... მზე რომელიც არ ამოვიდა... - 27 წლის ასაკში ოზურგეთის „მერცხალის” ყოფილი მეკარე გარდაიცვალა

🔵 აქ უკვე ათი ათასი კაცის სიკვდილს წინასწარმეტყველებენ - ნატო დუმბაძე „ომიკრონის“ შტამზე