ზვიად შალამბერიძე ოპოზიციაზე: პირდაპირ მოუწოდებდნენ ევროკავშირს, რომ მთელი საქართველო​ უნდა დასანქცირდეს, უვიზო რეჟიმზე მაქვს აქცენტი, ეს არის პირდაპირი ღალატი ჩვენი ქვეყნის წინააღმდეგ

საბოტაჟი და ღალატი ქვეყნისა და ხელისუფლების წინააღმდეგ - „ღამის კურიერში“ პარლამენტის რეგიონული პოლიტიკის კომიტეტის თავმჯდომარის პირველმა მოადგილემ ზვიად შალამბერიძემ 5 ოპოზიციური პარტიის აკრძალვის სარჩელის განხილვისას ისაუბრა და ის მაგალითები დაასახელა, რომლებსაც მმართველი გუნდი სწორედ საბოტაჟს, საკუთარი ქვეყნისა და ხალხის წინააღმდეგ ამ კონკრეტული პარტიების მხრიდან გადადგმულ ნაბიჯებს უწოდებს.

„დღეს, რასაც ვადევნებთ თვალყურს, იგივე ევროკავშირის თუ ევროსაბჭოს რეზოლუციები, თუნდაც გაფართოების დოკუმენტი, სადაც პირდაპირ არის მითითებული, რომ ის არ ემყარებოდა იმ ფაქტებს, რომლებსაც ხელისუფლება წელიწადში ორჯერ ვაგზავნით ევროკავშირში და დაყრდნობილი იყო დანარჩენ წყაროებზე... დანარჩენი წყაროები ხომ ძალიან კარგად ვიცით, ვინც არიან - ძირითად შემთხვევაში ეს ოპოზიციონერები არიან. ისინი არც მალავენ, ჩადიან იქ და ხმამაღლა ამბობენ იმას, თუ რას აკეთებენ და რა მიმართულებით უთხრიან ძირს ჩვენს სამშობლოს.

ფაქტია, რომ ნებისმიერი ასეთი რეზოლუცია, რომელიც არანაირ რეალურ ფაქტებზე არ არის დაყრდნობილი და სადაც თავიდან ბოლომდე ცალმხრივი სიცრუე ჩააქვთ, პირველ რიგში, სამშობლოს ღალატია. რა თქმა უნდა, ამას საბოლოოდ წერტილი უნდა დაესვას, იმიტომ, რომ ეს ზღვარი მათ დიდი ხანია გადაკვეთეს.

დღეს არის ასეთი მდგომარეობა, რომ ესენი [ოპოზიცია] ცდილობენ, ხელთ არსებული ყველა საშუალებით მიაღწიონ მიზანს - თუნდაც ქართველი ხალხის სანქცირებით, უვიზო რეჟიმის გაუქმებით, როგორმე „ქართული ოცნება“ ჩამოაცილონ ხელისუფლებას.

ეს უკვე მთავრობის წინააღმდეგ გადადგმული ნაბიჯია თუ მთლიანად საზოგადოების? საზოგადოებას არაერთხელ მოუსმენია, რომ ისინი პირდაპირ მოუწოდებდნენ ევროკავშირს მთელი საქართველოს დასანქცირებისკენ - უვიზო რეჟიმზე მაქვს ამ შემთხვევაში აქცენტი. ეს არის სწორედ ის, რასაც ვამბობთ - პირდაპირი ღალატი ჩვენი ქვეყნის წინააღმდეგ“, - აცხადებს ზვიად შალამბერიძე.