„დაგეგმე ფინანსები, რეჟიმი, წამოწყებები...“ - რას გვირჩევს ასტროლოგი დავით ნიბლაძე

ასტროლოგი დავით ნიბლაძე სოციალურ ქსელში ასტროლოგიურ პროგნოზს აქვეყნებს და წერს:

„4-დან 26 აგვისტომდე მერკური საკუთარი მმართველობის ნიშანში, ქალწულში იმოძრავებს. 

ლომისგან განსხვავებით, სადაც 19 ივლისიდან იმყოფებოდა, ქალწული ნაკლებად ეგოცენტრული და ექსპრესიულია. თვითგამოხატვის ნაცვლად, მისთვის თვითჩაღრმავება, ლოგიკური გადაწყვეტილებები, ანალიტიკური და კრიტიკული დამოკიდებულება გაცილებით მნიშვნელოვანია.

ქალწული ცდილობს სრულყოფას, საქმის იდეალურად შესრულებას და კრიტიკული არამხოლოდ სხვების, არამედ საკუთარი თავის მიმართაც საკმაოდ დიდი დოზითაა. ამ პერიოდში ლოგიკური და ანალიტიკური აზროვნება დაგვეხმარება საკითხები სწორად შევაფასოთ, მივიღოთ პრაქტიკული და შედეგებზე ორიენტირებული გადაწყვეტილებები და აღვიქვათ მიზეზშედეგობრივი კავშირები.

ეს არის გეგმების შედგენის, საქმის კეთების, კორექციების შეტანის, სწავლის, შრომის, ფუსფუსის პერიოდი. თუ ამ დროს შვებულება და დასვენების დღეები დაგემთხვა, გული არ დაგწყდეს. ეს ენერგია შეგიძლია, პერსონალური გეგმების შედგენისთვის გამოიყენო. დაგეგმე ფინანსები, რეჟიმი, წამოწყებები, თავის მოვლის გზები და ა.შ. მერკური ქალწულში დაგვეხმარება წესრიგის აღდგენა-დამყარებასა და ჯანმრთელობაზე მეტი ყურადღების გამოჩენაშიც.

თუ ზედმეტ კრიტიკულობას თავს ავარიდებთ და ურთიერთობებში მეტ დიპლომატიას გამოვიჩენთ, ეს პერიოდი საკმაოდ ნაყოფიერად ჩაივლის. ასევე ვეცადოთ, დეტალებში კირკიტის გამო მთლიანი სურათი არ დავკარგოთ.

არ დაგვავიწყდეს, რომ მზე ლომშია, რომელიც წვრილმანებისა და კრიტიკის მიმართ დიდი ლოალურობით არ გამოირჩევა. ამიტომ, ბალანსი და ზომიერების დაცვა იდეალური გამოსავალი იქნება.

ნაყოფიერ და მშვიდობიან დღეებს გისურვებთ!“, - წერს დავით ნიბლაძე.

ასევე დაგაინტერესებთ:

🔵 ლარი გამყარდა - რამდენად შეიძენთ უცხოურ ვალუტას 3 აგვისტოს?

🔵 რუსეთში ოზონის საწყობში ხანძარია - არიან დაშავებულები

🔵 „უიმედობის და უპერსპექტივობის გამო შრომისუნარიანი ქართველები მასიურად ტოვებენ საქართველოს და საშიში გზებით ემიგრაციაში მიდიან“ - მამუკა ხაზარაძე