იტალიაში ოთხი ახალგაზრდა მდინარეში გარდაცვლილი იპოვეს - რა მოხდა სინამდვილეში?!

11 იანვარს, გამთენიისას იტალიაში, პიაჩენცას პროვინციაში, დიდი ტრაგედია დატრიალდა. მდინარე ტრებიაში გადავარდნილ მანქანაში ოთხი ახალგაზრდა იპოვეს.

დომენიკო დი კანიო, უილიამ პაგანი, ელიზა ბრიკი და კოსტანტინო მერლო - ოთხივე მეგობარი 20-23 წლის იყო. ელიზა და კოსტანტინო შეყვარებულები იყვნენ. გამოძიებისთვის ამ დრომდე უცნობია, რა გახდა ავარიის მიზეზი. ერთ-ერთ მიზეზად ნისლიანი ამინდი სახელდება. უბედურ შემთხვევამდე მეგობრებმა უილიამის დაბადების დღე აღნიშნეს ერთად.

მეგობრებს მუსიკის სიყვარული აერთიანებდათ და როგორც მათი საერთო მეგობარი ჯოელი ჰყვება, ხშირად განმარტოვდებოდნენ ხოლმე მდინარის ნაპირას, მათ მიერვე აშენებულ ქოხში. უსმენდნენ და ქმნიდნენ საკუთარ მუსიკას, ცდილობდნენ დანარჩენი სამყაროსგან ცოტა ხნით მაინც ყოფილიყვნენ მოწყვეტილნი. ჯოელიც მათთან ერთად უნდა ყოფილიყო იმ დღეს, მაგრამ შემდეგ გადაიფიქრა.

"მე და კოსტანტინო სამი წლიდან ვმეგობრობთ, მას შემდეგ რაც მისმა აღმზრდელმა მშობლებმა იშვილეს უკრაინიდან. მათი მუსიკა არ მომწონდა, მაგრამ ყოველთვის ვეუბნებოდი, რომ თავი არ დაენებებინა და ოცნების განხორციელებისკენ სვლა არ შეეწყვიტა" - თქვა ჯოელმა ჟურნალისტებთან საუბრისას.

განგაშის ზარს ახალგაზრდების მშობლებმა შემოჰკრეს, მას შემდეგ, რაც არცერთი მათგანი დილით სახლში არ დაბრუნდა. ამასობაში 112-ზე ადგილობრივი მეთევზისგან შევიდა შეტყობინება, მდინარეში გადავარდნილი მანქანის შესახებ. სამწუხაროდ, ადგილზე მისულ მაშველებს, ოთხივე გარდაცვლილი დახვდათ.