ქართველი ემიგრანტი იტალიაში, სიმსივნით დაავადებული ქალების დონორი გახდა

სანამ მთავარ სათქმელს გეტყოდით, მანამ ერთი ამბავი უნდა მოგიყვეთ. 4 წელია არ არის, რაც ემიგრანტი ვარ. იტალიაში ოჯახით, მეუღლით და 4 წლის ქალიშვილით ჩავედით. გამოვიარეთ ყველაფერი, რაც თითოეულმა მათგანმა გაიარა, ვინც უცხო მიწაზე, უცხო ადამიანების გვერდით დასახლდა და ცხოვრება ხელახლა დაიწყო. ათი თვეა რაც საინფორმაციო სააგენტო exclusive.ge-ს სპეციალური წარმომადგენელი ვარ იტალიაში. ვაშუქებ ყველა საჭირო და მნიშვნელოვან ინფორმაციას, ვწერ ემიგრანტებზე, მათ ისტორიებსა თუ ქვეყანაში არსებულ მიმდინარე მოვლენებზე. ვთვლი, რომ ჩემი ჟურნალისტური საქმიანობით მნიშვნელოვანი წვლილი შემაქვს ემიგრანტების ინტეგრაციის პროცესში. 

იტალიაში, ჩემი ჟურნალისტური საქმიანობის პრაქტიკაში არაერთ ემიგრანტთან მომიწია ურთიერთობა, არაერთი მათგანის ცხოვრებას და პიროვნებას გავეცანი, რამდენიმე მათგანთან ვმეგობრობ და დარწმუნებული ვარ ამ მცირე სიას, კიდევ შეემატებიან საინტერესო ადამიანები, ადამიანები რომელთაც ემიგრაცია გვაერთიანებს. 

ორიოდ სიტყვით ფიქრია კუჭუხიძეზე უნდა გიამბოთ, საემიგრაციო საზოგადოება „ანოლფ“-ის (Anolf) ქართველ ოპერატორზე, რომელსაც პატარა ბავშვივით ახარებს თითოეული ქართველის წარმატება, ამ სიტყვის თქმის უფლებას კი მასთან თანამშრომლობის გამოცდილება მაძლევს. დოდო ენუქაშვილის ამბავიც, მისგან გავიგე, ისევე როგორც დანარჩენი საინტერესო ისტორიები, რომელთა შესახებაც ხშირად გიყვებით.  

დოდო ენუქაშვილი ემიგრანტია იტალიაში. „დიდი ხანი მინდოდა ამის გაკეთება და აი გავაკეთე!

რადგან ვარდისფერი ოქტომბერი, ძუძუს კიბოსთან ბრძოლის და ცნობიერების ამაღლების თვეა, მინდოდა მცირედი წვლილი შემეტანა და გავხდი თმის დონორი. ასე მცირედი თანადგომა მინდა გამოვუცხადო ყველაზე ძლიერ ქალებს მსოფლიოში!გაიღე თმა გახდი დონორი მათთვის ვისაც ეს უფრო მეტად სჭირდებათ“ - წერს დოდო ენუქაშვილი საკუთარ „ფეისბუკ“ გვერდზე. 

მათთვის, ვისთვისაც ეს ინფორმაცია აქამდე არ იყო ცნობილი, მინდა გითხრათ, რომ ვისაც სურვილი გაქვთ, შეგიძლიათ გახდეთ თმის დონორი. 

ვინაიდან ბუნებრივი თმისგან დამზადებული პარიკების ფასი, 2 000 ევრომდე მერყეობს, იტალიაში მოქმედებს სოლიდარობის ასეთი კამპანია, ქალები თმებს უსასყიდლოდ აბარებენ სილამაზის სალონებს და ამ ჟესტით, სიმსივნით დაავადებულ ქალბატონებს საშუალებას აძლევენ იყვნენ ლამაზები და ბედნიერები!

ავტორი: ხათუნა შარაძე