ქართველი მოჭიდავეების 6 მედალი და გუნდური მე-2 ადგილი ევროპის ჩემპიონატზე

ხორვატიის დედაქალაქ ზაგრებში დასრულდა ევროპის ჩემპიონატი თავისუფალი სტილით მოჭიდავეებს შორის. ტურნირის ბოლო ორთაბრძოლა მსოფლიოს 3-გზის ჩემპიონ გენო პეტრიაშვილსა და მის ტრადიციულ მეტოქეს, ტიტულოსანი თურქ ფალავან ტაჰა აკგულს შორის შედგა. სამწუხაროდ ქართველი სპორტსმენი 4:9 დამარცხდა და ვერცხლის მედალს დასჯერდა.

დღესვე საქართველოს ნაკრების წევრებმა კიდევ სამი მედალი მოიპოვეს და სამივე ბრინჯაო: შოთა ფარტენაძემ(61კგ) მესამე ადგილისთვის ბრძოლაში უკრაინელი ტარას მარკოვიჩი 6:5 დაამარცხა, ავთანდილ კენჭაძემ(74კგ) სომეხ ჰრაირ ალიკხანიანს 8:0 მოუგო, ხოლო მირიან მაისურაძემ(92კგ) უკრაინის სახელით მოასპარეზე ილია არჩაიას 7:2 სძლია.

შეგახსენებთ, რომ გუშინდელ საშეჯიბრო დღეს გივი მაჭარაშვილი(97კგ) ევროპის ჩემპიონის ტიტულს დაეუფლა, ხოლო ედემი ბოლქავაძემ(65კგ) ბრინჯაოს მედალი მოიპოვა.

ამრიგად, საქართველოს თავისუფალი სტილით მოჭიდავეთა ნაკრების 10-დან 6 წევრი საპრიზო სამეულში შევიდა და ევროპის 2023 წლის ჩემპიონატი 1 ოქროს, 1 ვერცხლის და 4 ბრინჯაოს მედლით და საერთო გუნდურ ჩათვლაში მეორე ადგილით დავასრულეთ.

21 აპრილიდან კონტინენტის პირველობაზე უკვე ბერძნულ-რომაული სტილით მოჭიდავეები ჩაებმებიან.