ემიგრანტული სასწაული - "საღამოს სახლში მოხუცის შვილი მოვიდა და იქიდან შეიცვალა სამყარო"

ემიგრანტული სასწაული.

ჩემს კორპუსში ერთი სართულით მაღლა ქართველი გოგონა დედასთან ერთად ცხოვრობს, ორივე ერთ ოჯახში მუშაობენ, რაღაცნაირი თვალები აქვს ამ გოგონას გეგონება მთელი სიცოცხლის წყარო მის თვალებშია მოთავსებული... უზომოდ ლამაზი ღიმილი აქვს, ზოგჯერ ლიფტში გადავეყრებით ხოლმე ერთმანეთს, ისეთი ცქრიალაა და ლამაზი დადებით ემოციებს იწვევს და ტკბილი მოკითხვებიც ავტომატურად ჩნდენა ჩვენს შორის, სულ ვფიქრობდი და მენანებოდა ემიგრანტობისათვის მისი ასაკისა გამო, მაგრამ მისმა დედიკომ ისეთი საინტერესო რამ მომიყვა ვაღიარებ ღირდა ამად ეს სევდიანი და შრომით დატვირთული წლები...

ერთ დღეს ჩაფიქრებულ და სევდიან სალომეს დასვენების საათებში სახლში გადატეხილი ფანქარი უპოვია, თეთრი ფურცელიც მოიძია და ასე სულ რომ არასოდეს დაუხატავს ადგა და გოგონა დახატა, დახატა და დადო მერე არც გახსენებია ის ნახატი.

საღამოს სახლში მოხუცის, რომელსაც სალომე უვლიდა, შვილი მოვიდა, ნახატს თვალი მოჰკრა და იქიდან შეიცვალა სამყარო, იქიდან იმ წუთიდან ეს კაფანდარა ლამაზთვალება სალომე სხვა ადამიანად გარდაისახა. მის ოთახში მეორე დღესვე გაჩნდა გუაში, ფუნჯი ფანქარი, უთვალავი თეთრი ფურცელი, ერთ ნაცნობ, ნიჭიერ მხატვართან ბებიას შვილის დაჟინებული თხოვნის შემდეგ სიარულიც დაიწყო და დღეს იტალიის ქალაქ ბარში საკმაოდ დახვეწილი ქართველი მხატვარი გვყავს. სალომე ფაქიზი საამო ჭკვიანი და შემდგარი ხელოვანი...

ჩემო საქართველო იცი რომ ეს შენი შვილია მარგალიტია, უცხო მიწაზე მოარული სასწაულია, ნიჭიერია ...ხატვა სევდამ და ტკივილმა დააწყებინა სამშობლოს სიყვარულმა და მონატრებამ დააწყებინა.... ვაი დედა სადაურსა სად წაიყვანს წუთისოფელი?

ჩემო მეზობელო, ჩემო ნიჭიერო,  უფალს ვთხოვ საქართველოს მალე დაუბრუნდე და იქ დიდი გამოფენა მოაწყო, ნახატებით რომლებიც გაჯერებულია ფერთა ხატოვნებით, სევდისფერი სილუეტებით... ღირდა ამად მერწმუნე შენი ემიგრანტობა.....

ავტორი: თეონა ჭანტურია

იტალია. ბარი.