„სინოვაკის“ ვაქცინის მეორე დოზის მისაღებად მოქალაქეთა რეგისტრაცია დაიწყო

„სინოვაკის“ ვაქცინის მეორე დოზის მისაღებად მოქალაქეთა რეგისტრაცია დაიწყო,- ამის შესახებ ინფორმაციას ჯანდაცვის სამინისტრო ავრცელებს.

უწყების ინფორმაციით, ჩინური წარმოების „სინოვაკის“ ვაქცინა, „სინოფარმის“ მსგავსად, ტრადიციულ მეთოდზე, ანუ ინაქტივირებული ვირუსის მეთოდოლოგიაზე დამყარებული ვაქცინაა, რომელიც 18 წელს ზემოთ ასაკის პირებისთვის გამოიყენება. „სინოვაკის“ ვაქცინამ ჯანმრთელობის მსოფლიო ორგანიზაციის ავტორიზაცია პირველ ივნისს მიიღო. დაავადებათა კონტროლის ეროვნული ცენტრის ინფორმაციით, საქართველოში „სინოვაკის“ პირველი დოზით 17 199 მოქალაქე აიცრა.

ვაქცინაციისთვის საჭირო ორი დოზა 14-28 დღის ინტერვალით კეთდება.

რეგისტრაციის გავლა ამ ბმულზე შეგიძლიათ.

ქვეყანაში „ასტრა-ზენეკათი“ ვაქცინაცია 2021 წლის 15 მარტიდან დაიწყო, „პფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.

ვაქცინა ჩინეთის მთავრობის მიერ არის დამტკიცებული და ასევე სხვა ათობით არეალში გადაუდებელი გამოყენებისთვის მინიჭებული აქვს ავტორიზაცია. ეს ქვეყნებია: აზერბაიჯანი, უკრაინა, თურქეთი, ალბანეთი, ბრაზილია, კამბოჯა, ჩილე, კოლუმბია, ეკვადორი, ეგვიპტე, ჰონკონგი, ინდონეზია, ლაოსი, მალაიზია, მექსიკა, პაკისტანი, პანამა, ფილიპინები, ტაილანდი, ტუნისი, ურუგვაი, ზიმბაბვე და სხვა.