უკრაინის მხარდაჭერა საქართველოს მხრიდან სასიცოცხლოდ აუცილებელია - თეონა აქუბარდია

საქართველოს პარლამენტის დეპუტატი, თეონა აქუბარდია, ფეისბუკის საკუთარ გვერდზე, უკრაინაში მიმდინარე პროცესებს ეხმიანება. 

"დღეს როცა მთელი ცივილიზებული დასავლეთი ცდილობს კრემლის სამხედრო აგრესიის შეჩერებას უკრაინის წინააღმდეგ ერთი მოსაზრება მინდა გაგიზიაროთ. კრემლი ხშირად წარსულში ნაცად ტაქტიკას იყენებს პოსტსაბჭოთა სივრცეში. ის რაც საქართველოს წინააღმდეგ ჰქონდა ნაცადი (დღეს რომ ჰიბრიდული ომს ეძახიან) ყირიმში (გაუმჯობესებული ფორმით შეიძლება ითქვას) გაიმეორა, რაც ანექსიით დაასრულა, ხოლო აღმოსავლეთ უკრაინაში კონფლიქტი გაწელა. 2008 წლის აგვისტოს ომის შემდეგ ოკუპირებული რეგიონების ე.წ. დამოუკიდებლობის აღიარების პროცესი ასე განცხადებების დონეზე დაიწყო და როგორც დასრულდა ჩვენ კარგად გვახსოვს. ეს კვირაა გააქტუალურდა დონეცკის და ლუგანსკის აღიარების საკითხი რუსეთის დუმაში. შესაბამისად, არ არის გამორიცხული ფართომასშტაბიანი სამხედრო აგრესიის ნაცვლად ეს ნაბიჯი გადადგას კრემლმა და გაწელოს დაძაბულობა ნაკლებ ფასად. (კრემლს ამ ფონზე რაღაც მოქმედება რომ სჭირდება ცხადია, თუმცა მე მაინც ვფიქრობ რომ ფართომასშტაბიანი ომი ძვირად დაუჯდება და ეს ახლა არ უნდა უღირდეს). ნებისმიერი სცენარის შემთხვევაში უკრაინის მხარდაჭერა საქართველოს მხრიდან სასიცოცხლოდ აუცილებელია, რადგან ჩვენ არამხოლოდ სტრატეგიული პარტნიორობა გვაკავშირებს, არამედ გვაქვს საერთო ინტერესები ნატოსა და ევროკავშირში წევრობის, რასაც რუსეთი ღიად უპირისპირდება, ისევე როგორც საერთო გამოწვევები (ოკუპაცია და ანექსია) კრემლის აგრესიული პოლიტიკიდან გამომდინარე. ამ ვითარებაში მთავრობა დუმს და პარლამენტმა უმრავლესობის გამო გაუშვა შესაძლებლობა ჯერ კიდევ დეკემბერში უკრაინის მხარდამჭერი რეზოლუციის მიღების. ეს შესაძლებლობა ახლაც არის, თუმცა ვფიქრობ რომ დაუყოვნებლივ არის ეს გასაკეთებელი და არა საგაზაფხულო სესიისას",-წერს, თეონა აქუბარდია.

ასევე დაგაინტერე­­­­სებთ:

🔵გახარიას პარტია აჭარაში, 25-დან 14-მა დამფუძნებელმა დატოვა

🔵იმედი გვაქვს, საქართველოს ხელისუფლება წარსულიდან დასკვნებს გამოიტანს და რუსეთის მიმართ უფრო დაბალანსებულ პოლიტიკას განახორციელებს - რუსეთის საგარეო უწყება

🔵შეგიძლია ამ სტრესს თავი დააღწიო, თუ მოინდომებ! - მამა პეტრე