დეკანოზი ანდრია: მინდა, მოვუწოდო მამა დოროთეს, ასევე „ტვ პირველს“, „ფორმულას“, ნუ ძალადობთ, ნუ მორალისტობთ და მორალის სიმაღლიდან ნუ გვასწავლით ჭკუას

 ძალიან უხერხული სიტუაციაა - ხალხი, რომელიც ახლა დაპატიმრებულია, მათ შორის დოროთეს მოწოდებებს გაჰყვა, მივიდა იქ და რა გამოვიდა? დაიჭირეს ეს ხალხი, - განუცხადა „იმედის კვირას“ საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ არქიმანდრიტ დოროთე ყურაშვილის რევოლუციურ მოწოდებებზე საუბრისას.

მან 4 ოქტომბერს განვითარებულ მოვლენებზე და რადიკალური მოწოდებების ავტორების პასუხისმგებლობაზე ისაუბრა.

„ადამიანები შევარდნენ პრეზიდენტის სასახლეში - გაუგონარი ამბავია! რამდენჯერ მომხდარა მსოფლიოში?! ვთქვათ. შეიძლება ჩამოთვალო, რომ ასეთი რამ სადმე მომხდარა. აღმოჩნდა, რომ ავანგარდში, ვინც მოუწოდებდა ხალხს, გამოდითო, ჩვენი სასულიერო პირია, ეკლესიის წარმომადგენელი.

ძალიან უხერხული სიტუაციაა. ხალხი, რომელიც ახლა დაპატიმრებულია, მათ შორის დოროთეს მოწოდებებს გაჰყვა, მივიდა იქ და რა გამოვიდა? - დაიჭირეს ეს ხალხი. ვინ არის პასუხისმგებელი? - თვითონ გამოვიდა და თქვა, მე არ ვარ პასუხისმგებელიო“, - განაცხადა დეკანოზმა.

ანდრია ჯაღმაიძემ ასევე ისაუბრა, თუ როგორია ეკლესიის პოზიცია არქიმანდრიტის ქმედებებზე.

„ეკლესიის პოზიცია ასეთ შემთხვევებში ყოველთვის არის, რომ ადამიანი ისევ სწორ გზაზე დააყენოს. შესაძლოა, საეკლესიო სასჯელი ერქვას, ვთქვათ, მაგრამ ეკლესია ზომებს იღებს იმისთვის, რომ ადამიანი საეკლესიო წიაღში დაშვებული ამა თუ იმ გადაცდომიდან მოატრიალოს, მოაბრუნოს. როგორი იქნება კომისიის დასკვნა არ ვიცი, მაგრამ დასკვნა იქნება“, - აღნიშნა დეკანოზმა.

ასევე, მამა ანდრიამ მიმართა მამა დოროთეს, „ტვ პირველსა“ და „ფორმულას“.

„მინდა მოვუწოდო როგორც მამა დოროთეს, ასევე „ტვ პირველს“, „ფორმულას“, ნუ ძალადობთ, ნუ მორალისტობთ და მორალის სიმაღლიდან ნუ გვასწავლით ჭკუას.

თუ ვინმეს უნდა შევარდნა პრეზიდენტის სასახლეში, ძალიან ცუდია და ამას არ ვემხრობით, მაგრამ თუ მაინც გადაწყვეტთ შევარდნას, უჩვენოდ გააკეთეთ ასეთი ამბები“, - განაცხადა დეკანოზმა ანდრიამ.