"დღეს ჩატარდება ივენთები!!!" - ერთ-ერთი ღამის კლუბის ხელმძღვანელის პასუხი შრომის ინსპექციას

კლუბ MTKVARZE-ს დამფუძნებელი, ქეთა გაბუნია შრომის ინსპექციის მიერ გავრცელებულ განცხადებას სოციალურ ქსელ ფეისბუკში ეხმაურება.

როგორც ქეთა გაბუნია წერს, რომ საკოორდინაციო საბჭოსგან გახსნის დასტურს დღემდე, 17 დეკემბრამდე ელოდებოდნენ და დღეს დაგეგმილი ღონისძიებები მაინც ჩატარდება.

"2 წლიანი ლოდინის მერე, ძლივს ვიხსნებით.

იმის ფონზე, როცა ათასობით ადამიანს კრებენ მოედნებზე საახალწლო ღონისძიებებზე, თურმე კლუბები საფრთხის შემცველი ადგილები ვართ.

თვეებია მიდის კვლევები, გახსნის პროტოკოლის შემუშავება, წესების დადგენა და უსაფრთხო ივენთებისთვის მომზადება, რომ უბრალოდ არ გავნადგურდეთ და ახალი წლის პერიოდი მაინც გამოვიყენოთ ოდნავ გონზე მოსასვლელად.

აბსოლუტურად ყველა პუნქტი გავლილი და შეთანხმებულია, სავენტილაციო სისტემის ტექნიკური მახასიათებლებით დაწყებული, ტევადობის და შიგნით ოპერირების საკითხებით დამთავრებული.

მათ დიდი ხანია იციან რომ 17-18 დეკემბერს ვიხსნებით და ოფიციალურ დასტურს საკოორდინაციო საბჭოსგან ველოდებოდით დღესაც, რადგან წინა 2 გადაიდო ჯერ მინისტრის გადადგომოს და შემდეგ პრემიერის მივლინების გამო.

აი ახლა, საღამოს 6 საათზე ვკითხულობთ ამას.

რა არის ეს, თუ არა მიზანმიმართული განადგურება და უბრალოდ ჩვენი გაქრობის მცდელობა.

დღეს ჩატარდება ივენთები!!!", - წერს გაბუნია.

დღეს, 17 დეკემბერს, ორ წლიანი პაუზის შემდეგ, თბილისში ღამის კლუბების მიერ რამდენიმე ღონისძიებაა დაგეგმილი.

დღესვე შრომის ინსპექციამ განცხადება გაავრცელა, სადაც აღნიშნულია, რომ საკოორდინაციო საბჭოს ღამის კლუბების გახსნაზე გადაწყვეტილება აღნიშნულ ეტაპზე არ მიუღია და შესაბამისად, ღონისძიებების გამართვა ნებადართული არ არის.

ამავე თემაზე:

🔲 შრომის ინსპექცია:  ღამის კლუბები არ გაიხსნება

🔲 ორ წლიანი პაუზის შემდეგ, ღამის კლუბები საქართველოში დღეიდან იხსნება