გარდაიცვალა რეჟისორი თემურ ჩხეიძე

78 წლის ასაკში გარდაიცვალა ქართველი რეჟისორი თემურ ჩხეიძე. ამის შესახებ ინფორმაცია საქართველოს პირველ არხს თემურ ჩხეიძის ახლობლებმა დაუდასტურეს.

თემურ ჩხეიძემ დაამთავრა თბილისის სახელმწიფო თეატრალური ინსტიტუტის სარეჟისორო ფაკულტეტი 1965 წელს. 1965-1967 წლებში იყო ზუგდიდის დრამატული თეატრის, 1967-1970 წწ-ში მოზარდ მაყურებელთა ქართული თეატრის, 1970-1980 წლებში რუსთაველის თეატრის, 1980-1990 წლებში მარჯანიშვილის თეატრის რეჟისორი. 1981-1988 წლებში საქართველოს სატელევიზიო თეატრის სამხატვრო ხელმძღვანელი, თბილისის სახელმწიფო თეატრალური ინსტიტუტის მსახიობის ოსტატობისა და რეჟისურის პედაგოგი.

1991 წლიდან იყო სანქტ პეტერბურგის დიდი დრამატული თეატრის რეჟისორი, 2004 წლიდან მთავარი რეჟისორი, 2007-2013 წლებში სამხატვრო ხელმძღვანელი. დადგმული აქვს 80-მდე დრამატული, საოპერო და სატელევიზიო სპექტაკლი, მათ შორის, მოზარდ მაყურებელთა თეატრში.

მიღებული აქვს მრავალი ჯილდო და პრემია, მათ შორის, 2013 წელს ილიას მედალი (მარად და ყველგან, საქართველოვ, მე ვარ შენთანა) ქართული კულტურისა და სულიერების წინაშე განსაკუთრებული ღვაწლისთვის; 2010 წელს გახდა თბილისის საპატიო მოქალაქე, 1981 – საქართველოს სახალხო არტისტი.

1997 წელს მიღებული აქვს „ოქროს სოფიტი“, სანქტ პეტერბურგის უმაღლესი თეატრალური პრემია ნომინაციაში „რეჟისორის საუკეთესო ნამუშევარი“ ჟან ანუის „ანტიგონეს“ დადგმისთვის.

თემურ ჩხეიძე იყო საპატიო ნიშნის ორდენის „ოქროს გრან-პრის“ მფლობელი, ასევე, მიღებული აქვს შოთა რუსთაველის სახელობის სახელმწიფო პრემია, კოტე მარჯანიშვილის სახელობის პრემია, მიხეილ თუმანიშვილის სახელობის პრემია, საქართველოს თეატრალური პრემია „ოქროს ნიღაბი“ (ორგზის მფლობელი).

ასევე წაიკითხეთ:

🔵ირაკლი კობახიძის განმარტება, რა უპირატესობები აქვს საქართველოს ასოცირებული ტრიოსთან მიმართებით, „ნაციონალური მოძრაობის“ მხარდამჭერების „ორგანიზებული თავდასხმის“ ობიექტი გახდა - „ქართული ოცნების“ პრესსამსახური 

🔵"ერთმორწმუნეებმა" გაანადგურეს 16-ე საუკუნის ტაძარი, დაბომბეს ოდესა, მიკოლაევი, დღეს დილას კი კიევის ორ რაიონს მოხვდა ურდოს რაკეტები! - ბუკა პეტრიაშვილი