ღარიბაშვილის ადვოკატი: მან გასცა ამომწურავი პასუხი ყველა კითხვას, რაც გამოძიებას ჰქონდა - რაც შეეხება თანხას, ამასთან დაკავშირებით მისცა სწორედ ღარიბაშვილმა ჩვენება, განმარტებები გააკეთა თანხის წარმომავლობასთან დაკავშირებით

რაც შეეხება თანხას და აღნიშნულ ეპიზოდს, ამასთან დაკავშირებით მისცა სწორედ ბატონმა ირაკლი ღარიბაშვილმა ჩვენება, განმარტებები გააკეთა ამ თანხის წარმომავლობასთან დაკავშირებით, - განაცხადა ყოფილი პრემიერ-მინისტრის, ირაკლი ღარიბაშვილის ადვოკატმა ამირან გიგუაშვილმა.

მან ასევე აღნიშნა, რომ თანხის ოდენობაზე გამოძიების ინტერესებიდან გამომდინარე ამ ეტაპზე ვერ ისაუბრებს.

„კითხვები უკავშირდებოდა მის ბიზნეს საქმიანობას იმ პერიოდზე, როდესაც იგი კერძო სექტორში იყო და ასევე იმ პერიოდზე, როდესაც იგი იკავებდა მაღალ პოლიტიკურ თანამდებობებს. ბატონმა ირაკლიმ გასცა ამომწურავი პასუხი ყველა კითხვას, რაც გამოძიებას ჰქონდა. რაც შეეხება მოლოდინებს, რა თქმა უნდა, ეს უნდა შეაფასონ შესაბამისმა უწყებებმა. რაც შეეხება თანხას და აღნიშნულ ეპიზოდს, ამასთან დაკავშირებით მისცა სწორედ ბატონმა ირაკლი ღარიბაშვილმა ჩვენება, განმარტებები გააკეთა ამ თანხის წარმომავლობასთან დაკავშირებით. რაც შეეხება ოდენობას და სხვა დეტალებს, ამაზე გამოძიების ინტერესებიდან გამომდინარე, ამ ეტაპზე განმარტებებს ვერ გავაკეთებ”, - განაცხადა ადვოკატმა.

ოთარ ფარცხალაძისა და მიხეილ ჩოხელის ადვოკატი გაგი მოსიაშვილი კი აღნიშნავს, რომ თანხის წარმომავლობა საგამოძიებო ორგანოსთვის ცნობილი არ არის.

„ვფიქრობ, რომ არასწორი ინფორმაციაა, ვინაიდან ჩხრეკის დროს ამოღებული დოკუმენტაცია არის აღნიშნული აღნიშნული თანხის წარმომავლობის დადასტურების წინაპირობა. არ ვიცი, რა პრეტენზიები გააჩნია საგამოძიებო ორგანოს ბატონ ოთართან მიმართებაში”, - განაცხადა ადვოკატმა.

სახელმწიფო უსაფრთხოების სამსახურში 22 ოქტომბერს გამართულ ბრიფინგზე სუს-ის ანტიკორუფციული სააგენტოს დირექტორმა ემზარ გაგნიძემ განაცხადა: „სახელმწიფო უსაფრთხოების სამსახურის ანტიკორუფციულ სააგენტოში გამოიკითხა ყოფილი პრემიერ-მინისტრი ირაკლი ღარიბაშვილი, რომელმაც სრულად ითანამშრომლა გამოძიებასთან და აღიარა წლების განმავლობაში უკანონო შემოსავლების მიღების ფაქტი“.

17 ოქტომბერს, საქართველოს პროკურატურაში გამართულ ბრიფინგზე გენერალურმა პროკურორმა გიორგი გვარაკიძემ განაცხადა, რომ ირაკლი ღარიბაშვილის, გრიგოლ ლილუაშვილისა და ოთარ ფარცხალაძის და მათთან დაკავშირებული რვა პირის საცხოვრებელ სახლებში ჩხრეკა ჩატარდა. ამოღებულია სხვადასხვა ელექტრონული მოწყობილობა, დოკუმენტაცია და დიდი ოდენობით ფულადი თანხა. ღონისძიება სუს-ის ანტიკორუფციულ და სახელმწიფო უსაფრთხოების დეპარტამენტებში სხვადასხვა სისხლის სამართლის საქმეებზე მიმდინარე გამოძიების ფარგლებში განხორციელდა.