თენგიზ შარმანაშვილი: მიუხედავად რევოლუციის ხუთი მცდელობისა, არაფერი გამოუვიდათ. დარწმუნებული ვარ, არც ვიზალიბერალიზაციასთან დაკავშირებული შანტაჟი მათთვის არანაირ შედეგს არ მოიტანს

„მიუხედავად რევოლუციის ხუთი მცდელობისა, არაფერი გამოუვიდათ. დარწმუნებული ვარ, არც ვიზალიბერალიზაციასთან დაკავშირებული შანტაჟი მათთვის არანაირ შედეგს არ მოიტანს“, - განაცხადა გადაცემაში „დღის ქრონიკა“ თავდაცვისა და უშიშროების საპარლამენტო კომიტეტის თავმჯდომარის პირველმა მოადგილე თენგიზ შარმანაშვილმა რადიკალების შეცვლილ ტაქტიკასა და მათთვის დავალებების მიმცემებთან დაკავშირებით.

თენგიზ შარმანაშვილის თქმით, არანაირი არგუმენტი სამართლებრივი იმის, რომ ვიზალიბერალიზაცია შეჩერდეს, არ არსებობს.

„ამას ისინი პირველად არ აკეთებენ. ისინი მუდმივად, პერმანენტულად ცდილობენ მოღალატეობრივი გზა განავრცონ ჩვენი აგენტურის მეშვეობით. ჯერ იყო, ვიზალიბერალიზაცია რომ არ მიგვეღო, ამისთვის დიდი ძალისხმევა დახარჯა „დიფ სთეითის“ აქაურმა აგენტურამ. შემდგომში, როდესაც დადგა საკითხი კანდიდატი ქვეყნის სტატუსის მინიჭებაზე, ასევე დიდი ძალისხმევა და დიდი ფული დაიხარჯა, რომ კანდიდატის სტატუსი არ მიგვეღო. მაშინ, როდესაც ყველა პარამეტრით ვუსწრებდით სხვა ორ ქვეყანას, უკრაინასაც და მოლდოვასაც, მათ მიანიჭეს და ჩვენ დაგვიგვიანეს ერთ წელზე მეტი. უბრალოდ, მეტიც აღარ შეიძლებოდა რომ დაეგვიანათ, თორემ იმის მონიჭებაც არ უნდოდათ ბოლომდე. მოლაპარაკებების გახსნაზეც დიდი ძალისხმევა დახარჯეს და ისევ ეს დელეგაცია, იმავე შემადგენლობით დაიძრა ბრიუსელისკენ. რა თქმა უნდა, მათი ხელშეწყობით უნდათ წარმოაჩინონ, თითქოს ქართველი ხალხის უწყვეტი პროტესტის ნებიდან გამომდინარე იღებენ ასეთ გადაწყვეტილებებს. ახლა ისევ დაიწყეს ახალი ეტაპი ვიზალიბერალიზაციის შეჩერების თაობაზე. არგუმენტი არის ნული. არანაირი არგუმენტი სამართლებრივი იმის, რომ ვიზალიბერალიზაცია შეჩერდეს, არ არსებობს. ყველა ის პარამეტრი, რომელიც გაწერილია ვიზალიბერალიზაციასთან დაკავშირებული, პირნათლად არის შესრულებული.

ერთადერთი პოლიტიკური მიზანი არის, რომ საქართველოში არსებული ხელისუფლება ძალადობრივი გზით ჩამოაშორონ ძალაუფლებას და მათი მორჩილი ხელისუფლება მოიყვანონ. ამის გასაკეთებლად მიდიან ყველაფერზე. მიუხედავად რევოლუციის ხუთი მცდელობისა, არაფერი გამოუვიდათ. დარწმუნებული ვარ, რომ არც ვიზალიბერალიზაციასთან დაკავშირებული შანტაჟი მათთვის არანაირ შედეგს არ მოიტანს“, - აღნიშნა თენგიზ შარმანაშვილმა.

ჩავარდნილი გეგმების შემდეგ ოპოზიცია ტაქტიკას ცვლის. ამჯერად ოპოზიცია და მათთვის დავალებების მიმცემები ვიზალიბერალიზაციის შეჩერებაზე აქტიურ მუშაობას იწყებენ. ამ კუთხით იხარჯება კონკრეტული თანხებიც.