გიორგი კახიანი: ყველაფრის გათვალისწინებით, ელჩს მეტი სიფრთხილე მართებს, როდესაც დახურულ შეხვედრებზეა ლაპარაკი, კითხვები ჩნდება და კარგი იქნება, თუ გარკვეული განმარტებები გაკეთდებოდა ნორვეგიის საელჩოს მხრიდან

კითხვები ჩნდება და კარგი იქნება, თუ გარკვეული განმარტებები გაკეთდებოდა ნორვეგიის საელჩოს მხრიდან, - განაცხადა გადაცემაში „დღის ქრონიკა“ საქართველოს პარლამენტის თავმჯდომარის მოადგილე გიორგი კახიანმა გვარამია-ჯაფარიძისა და ნორვეგიის ელჩის ფარულ შეხვედრასთან დაკავშირებით.

კახიანის თქმით, ყველაფრის გათვალისწინებით, ელჩს მეტი სიფრთხილე მართებს, როდესაც დახურულ შეხვედრებზეა ლაპარაკი.

„პირველ რიგში, ვიტყოდი, რომ არასასურველი გამოცდილება გვაქვს. გვახსოვს სხვა ელჩების შემთხვევები, თუ როგორ მონაწილეობდნენ ისინი პოლიტიკურ პროცესებში. მათი მხრიდან გვახსოვს პოლიტიკური განცხადებები, აქციებზე მისვლა, სასამართლო პროცესებზე დასწრება და ა.შ. ანუ ისეთი მოქმედებები, რომლებიც ელჩის კომპეტენციას სცდება და პოლიტიკურ პროცესებში მის ჩართულობაზე მიუთითებს. ბუნებრივია, ეს ფონიც, წინაპირობაც გარკვეულ კითხვებს აჩენს, როდესაც შეხვედრა ფარულად ხდება. ეს არ ყოფილა გასაჯაროებული შეხვედრა. ერთი მხრივ, თითქოს ჩვეულებრივი მოვლენაა, ჩვენს პრაქტიკაშიც ხშირად ხდებოდა, როდესაც ელჩები ხვდებოდნენ ხელისუფლების წარმომადგენლებს, ოპოზიციური პარტიების წარმომადგენლებს. ეს ყველაფერი ღიად, საჯაროდ ხდებოდა. ასეთი შეხვედრები პარლამენტის შენობაშიც იმართებოდა, საელჩოშიც და დასამალიც არ იყო, მაგრამ როდესაც ჩვენ ასეთი მძიმე ფონი გვაქვს, გვახსოვს სულ ცოტა ხნის წინ რევოლუციური გადატრიალებების რამდენიმე მცდელობა, ამ პროცესებში უცხოური ფაქტორების მონაწილეობის, მათ შორის ზოგიერთი ელჩის სახით, ბუნებრივია, ეს ყველაფერი კითხვებს აჩენს. მით უმეტეს, როდესაც ლაპარაკია შეხვედრაზე, რომელიც ფარულად წარიმართა. იმავდროულად, შეხვედრა იყო ისეთ პოლიტიკოსებთან, რომლებიც განსაკუთრებული რადიკალიზმით გამოირჩევიან. თავად ნორვეგიის ელჩთან შესაძლოა ნაკლებად საპრეტენზიო იყოს, იგი ახალი დანიშნულია. პირიქით, ასე ვიტყოდი, რომ ამ ფონზე და ყველაფერ ამის გათვალისწინებით, ელჩს მეტი სიფრთხილე მართებს, როდესაც ასეთ შეხვედრებზეა ლაპარაკი. კითხვები ჩნდება და კარგი იქნება, თუ გარკვეული განმარტებები გაკეთდებოდა ნორვეგიის საელჩოს მხრიდან, თუმცა ჯერჯერობით ვხედავთ, რომ ამ საკითხზე დუმილია“, - აღნიშნა მან.

„ქრონიკის“ ექსკლუზიური ინფორმაციით, ნიკა გვარამია და ზურა ჯაფარიძე ნორვეგიის ელჩს ფარულად შეხვდნენ. როგორც ირკვევა, ინიციატორი თავად დიპლომატი იყო.