ირაკლი კირცხალია არასამთავრობოთა დაფინანსების სქემაზე: დარწმუნებული ვარ, ანტიკორუფციული ბიურო დაინტერესდება ამ ორგანიზაციის საქმიანობით

დარწმუნებული ვარ, ანტიკორუფციული ბიურო დაინტერესდება ამ ორგანიზაციის საქმიანობით და თითოეული იმ ტრანზაქციით, რომელიც განხორციელდა, - ასე გამოეხმაურა საპარლამენტო უმრავლესობის ლიდერი ირაკლი კირცხალია „იმედის კვირის“ ექსკლუზიურ ინფორმაციას, რომელიც ქართული „ფარას“ გვერდის ავლით არასამთავრობოთა დაფინანსების მორიგ სქემას ეხება.

„რაც შეეხება ამ სქემას, რომელიც გაიშიფრა, ამას დიდი ანალიტიკა არ სჭირდება - ეს არის სწორედ ის გზა, რომელსაც პოულობენ სამწუხაროდ, ბრიუსელიდან. ეს არის ის არამიზნობრივი ხარჯვა, რასაც ამდენი ხანია ვამხელთ. ჩვენ პირდაპირ ეთერში მოვისმინეთ ერთ-ერთი ე.წ. არასამთავრობო ორგანიზაციის დამფუძნებლის განცხადება, რომელიც ამბობდა, რომ გამონახავდა გზებს, რომ როგორმე ქვეყანაში არსებული საკანონმდებლო სივრცისთვის გვერდი აეარათ. სცენარი როდესაც ჩამოდის, შემსრულებელს სჭირდება თანხა და ყველაფერს აკეთებენ, რომ ამ დესტრუქციულ ძალებს არ მოაკლდეთ „საწვავი“. დარწმუნებული ვარ, ანტიკორუფციული ბიურო დაინტერესდება ამ ორგანიზაციის საქმიანობით და თითოეული იმ ტრანზაქციით, რომელიც განხორციელდა“, - განაცხადა კირცხალიამ.

„იმედის კვირის“ ექსკლუზივის თანახმად, ორგანიზაცია „ჯისიარტმა“ ევროკომისიისგან 3 მილიონამდე ლარი მიიღო. გრანტის დანიშნულების მიხედვით, თანხა მსხვერპლთა ტანჯვის შემსუბუქებას უნდა მოხმარდეს. კანონში არსებული გამონაკლისით, ამ შემთხვევაში, ორგანიზაციას რეესტრში რეგისტრირება აღარ ევალება. მიღებული თანხა 11 ორგანიზაციაზე განაწილდა, რომლებიც საპროტესტო აქციების დაფინანსებასა და ჯარიმების გადახდაში აქტიურად მონაწილეობენ. თანხა კონკრეტულმა უფლებადამცველებმაც მიიღეს.