ლევან მაჭავარიანი ამერიკის შეერთებულ შტატებთან ურთიერთობაზე: ძალიან ლოგიკურად მიდის ყვველაფერი და ძალიან ოპტიმისტურია განწყობა

ძალიან ლოგიკურად მიდის ყვველაფერი და ძალიან ოპტიმისტურია განწყობა, - განაცხადა გადაცემაში ფრაქცია „ქართული ოცნების“ თავმჯდომარის მოადგილე ლევან მაჭავარიანმა საქართველოსა და ამერიკის შეერთებულ შტატებს შორის ურთიერთობაზე საუბრისას.

მისივე თქმით, შეერთებული შტატების ახალ ადმინისტრაციასთან საქართველოს ხელისუფლებას ყველა მნიშვნელოვან საკითხზე სრული თანხვედრა აქვს და ლოგიკურად ურთიერთობების აღდგენას წინ ვერაფერი აღუდგება.

„ძალიან ოპტიმისტურია ჩვენი მოლოდინი, ვინაიდან რაღაც ტიპის სამუშაო პროცესი უკვე დაწყებულია და გაგრძელდება. ამ თვეშივე შემდეგი დელეგაცია ჩამოვა ბატონი რუბიოს მიერ დაკოპლექტებული.

პირველ რიგში ყველას შევახსენებ, რომ ეს ურთიერთობები დააზიანა წინა ადმინისტრაციამ. როდესაც რადიკალური ოპოზიცია ჩვენ გვსაყვედურობს, რომ თითქოს წინა ადმინისტრაციასთან ჩვენი პრეტენზიები არის წინაპირობა რატომაც არ არის ურთიერთობები აღდგენილი, ეს არის ნონსენსი, ვინაიდან ვისთანაც ჩვენ პრეტენზიები გვქონდა, თავდაცვით რეჟიმში, იმას აცხადებს დღევანდელი ადმინისტრაცია მტრად.

ბატონ დონალდ ტრამპს ჩვენ ღიად ვგულშემატკივრობდით და სრული თანხვედრა არის ღირებულებით, მსოფლმხედველობრივ ნაწილში, გზავნილებში, სრული თანხვედრა არის შეფასებებში ევრობიუროკრატებთან დაკავშირებით, აბსოლუტურად თანხვედრაა ყველაფერში, შესაბამისად ლოგიკურად წინ ამას ვერაფერი ვერ უნდა აღუდგეს. იყო პოზიტიური სიგნალები, ეს გადავიდა მუშა რეჟიმზე, ველოდებით შემდეგი დელეგაციის სტუმრობას, იცის ამერიკის შეერთებულმა შტატებმა ჩვენი მზაობა“, - განაცხადა ლევან მაჭავარიანმა.