ლევან მაჭავარიანი: თუ ვინმეს რამის გაპროტესტება უნდა, დღეს მე-300 დღეა, 3000 დღე აპროტესტონ, ოღონდ არავინ გავიდეს სტანდარტის ფარგლებს გარეთ

თუ ვინმეს რამის გაპროტესტება უნდა, დღეს მე-300 დღეა, 3000 დღე აპროტესტონ, ოღონდ არავინ გავიდეს სტანდარტის ფარგლებს გარეთ,- განაცხადა ფრაქცია „ქართული ოცნების“ თავმჯდომარის პირველმა მოადგილემ და თბილისის საარჩევნო შტაბის ხელმძღვანელმა ლევან მაჭავარიანმა გადაცემაში „არჩევანის პირისპირ".

მისივე თქმით, ქართული სამართალდამცავი უწყებები გაცილებით მაღალი სტანდარტებით მოქმედებენ, ვიდრე გერმანიაში, საფრანგეთში ან სხვა ქვეყნებში.

„ძალიან ბევრი აქცია გვინახავს და როდესაც დაუსჯელობის სინდრომი ჰქონიათ ისეთ ადამიანებს, რომლებიც ყოველგვარ ზღვარს გადასცდებოდნენ ხოლმე, 2-3 წლის წინ პოლიციის მანქანებს წვავდნენ და ადეკვატურ პასუხს არ იღებდნენ, რამაც დაუსჯელობის სინდრომი გააჩინა. წინა წლის ნოემბერ-დეკემბრის აქციებზე უკვე დაკავებებს ჰქონდა ადგილი. მადლობა ღმერთს, სამართალდამცველების მხრიდან მხოლოდ ერთეული შემთხვევები იყო გადაცდომების, რასაც კი ბატონო, ვაღიარებთ, თუმცა გაცილებით მაღალი სტანდარტებით მოქმედებენ, ვიდრე გერმანიაში, საფრანგეთში. მარტო ბოლოდროინდელ აქციებს რომ შეხედოთ, ხელკეტებით უსწორდებიან ქალბატონებს და იქ პრობლემა არ არის. აქ კიდევ, როდესაც შენ ცოცხლად გწვავენ, პარლამენტს წვავენ და ერთეული გადაცდომები არის, დაქცეულა თურმე ქვეყანა. რა თქმა უნდა ეს ცუდია, მაგრამ ხაზს ვუსვამ, რომ გაცილებით მაღალი სტანდარტით მოქმედებს ჩვენი პოლიცია. გეკა გელაძეს კი დებიუტი აქვს ისეთი, რომ მე არ ვიცი შს მინისტრის პოსტზე სხვა ქვეყანაში თუ ჰქონიათ ასეთი დებიუტი. ჩვენი სამართალდამცავი უწყებები, ინსტიტუტები არიან მოწოდების სიმაღლეზე, შესაბამისად, თუ ვინმეს ექნება იმის სურვილი, განზრახვა, რომ ქვეყანა ხელოვნურად არიოს, დაისჯება კანონის მაქსიმალური სიმკაცრით, ამას ვპირდებით ყველას. დანარჩენი, თუ ვინმეს რამის გაპროტესტება უნდა, დღეს მე-300 დღე არის, 3000 დღე აპროტესტონ, ოღონდ არავინ გავიდეს სტანდარტის ფარგლებს გარეთ“, - განაცხადა ლევან მაჭავარიანმა.