ლევან მახაშვილი გვარამია-ჯაფარიძის ნორვეგიის ელჩთან ფარულ შეხვედრაზე: წარსულმა გამოცდილებამ გვაჩვენა, რომ თითოეული ასეთი შეხვედრა შემდგომი რადიკალიზაციის წყარო იყო

ყველაზე დასანანი და შეიძლება გასაკვირიც ის არის, რომ ნორვეგიის ელჩი სულ ახალი ჩამოსულია, - განაცხადა გადაცემაში „იმედი LIVE“ ევროპასთან ინტეგრაციის საპარლამენტო კომიტეტის თავმჯდომარე ლევან მახაშვილმა გვარამია-ჯაფარიძის ნორვეგიის ელჩთან ფარულ შეხვედრაზე.

მახაშვილის თქმით, წარსულმა გამოცდილებამ აჩვენა, რომ თითოეული ასეთი შეხვედრა შემდგომი რადიკალიზაციის წყარო იყო.

„ამ გადმოსახედიდან რომ შევხედოთ, თითოეული ასეთი შეხვედრა, როგორც ჩანს, იყო დაგეგმვა, როგორ შეიძლება გვერდი აუარონ ქართულ კანონმდებლობას, ფარულად რაღაც ახალი გზები ნახონ. ეს ფარულად და ღიად გაცხადებული აქვთ მარტა კოსს და სხვებს, რომ მაქსიმალურად შეეცდებიან გზების ნახვას.

ყველაზე დასანანი აქ სწორედ ის არის და შეიძლება გასაკვირიც, რომ ნორვეგიის ელჩი, რომელზეც გვაქვს საუბარი, სულ ახალი ჩამოსულია, მხოლოდ რამდენიმე კვირაა საქართველოში საქმიანობას შეუდგა. წარსულმა გამოცდილებამ გვაჩვენა, რომ თითოეული ასეთი შეხვედრა წყარო იყო შემდგომი რადიკალიზაციის. თითოეული ასეთი შეხვედრის შემდგომ ასე ნაბიჯ-ნაბიჯ ეს დიპლომატები ფაქტობრივად პოლიტიკოსებად გადაიქცეოდნენ ხოლმე. რამდენი გვინახავს, დაუწყია ღიმილით და მჭახე განცხადებებით დიპლომატიური საქმიანობა და კუდამოძუებული ჩუმად გაპარულა, როგორც პრაქტიკულად პოლიტიკოსი, ქართველი რადიკალური პოლიტიკოსი. ამის თავიდან აცილება გვინდა. უპირველესად, მათივე ინტერესების, მათივე ქვეყნის რეპუტაციის დაცვის გამო“, - აღნიშნა მან.

„ქრონიკის“ ექსკლუზიური ინფორმაციით, ნიკა გვარამია და ზურა ჯაფარიძე ნორვეგიის ელჩს ფარულად შეხვდნენ. როგორც ირკვევა, ინიციატორი თავად დიპლომატი იყო.