"ნებისმიერი მოთხოვნა, რომელიც ჯანდაცვის სამინისტროში შემოვა იუსტიციის სამინისტროდან დაუყოვნებლივ განიხილება" - თამარ გაბუნია ნიკოლოზ ყიფშიძის განცხადებაზე

კითხვაზე: შეხვდებიან თუ არა ჯანდაცვის სამინისტროს წარმომადგენლები კონსილიუმის წევრებს, სადაც საქართველოს მესამე პრეზიდენტის ჯანმრთელობის მდგომარეობაზე იმსჯელებენ?? - საქართველოს ჯანდაცვის მინისტრის მოადგილე, თამარ გაბუნია განმარტავს, რომ იუსტიციის სამინისტროს მიერ მათი უწყებისთვის მიმართვის შემთხვევაში, საკითხი დაუყოვნებლივ განიხილება და ჯანდაცვის სამინისტროს სათანადო რეაგირება ექნება.

"მოთხოვნაზე, რომელიც პენიტენციური სამსახურიდან და იუსტიციის სამინისტროდან მოვა ნებისმიერი პირის ჯანმრთელობის მდგომარეობასთან დაკავშირებით ბუნებრივია, გვაქვს მზაობა. ნებისმიერი მოთხოვნა, რომელიც ჯანდაცვის სამინისტროში შემოვა იუსტიციის სამინისტროდან, რა თქმა უნდა, დაუყოვნებლივ განიხილება და ჯანდაცვის სამინისტრო სათანადო რეაგირებას უზრუნველყოფს",- განაცხადა თამარ გაბუნიამ.

მანამდე, მიხეილ სააკაშვილის პირადმა ექიმმა ნიკოლოზ ყიფშიძემ განაცხადა:

"მოვუწოდებ ჯანდაცვის სამინისტროს, შეხვდეს კონსილიუმს და გადაწყვიტონ, გადაგვყავს საქალაქო საავადმყოფოში, თუ არა".

საქართველოს ექსპრეზიდენტი მიხეილ სააკაშვილი 1 ოქტომბერს დააკავეს და იგი დაკავების დღიდან შიმშილობს. ის ამჟამად იმყოფება სასჯელაღსრულების სისტემის მე-18 სამკურნალო დაწესებულებაში. 11 ნოემბერს მიხეილ სააკაშვილმა განაცხადა, რომ მაღალტექნოლოგიურ კლინიკაში, გარდა გორის სამხედრო ჰოსპიტლისა, გადაყვანის შემთხვევაში, მზად არის შიმშილობა შეწყვიტოს. გაერთიანებული ოპოზიცია კი 6 ნოემბრიდან პერმანენტულ აქციებს მართავს მიხეილ სააკაშვილის მაღალტექნოლოგიურ კლინიკაში გადაყვანის მოთხოვნით.

ასევე დაგაინტერესებთ:

🔲 "მშვიდობიანი პროტესტი დედაქალაქში მუდმივად გაგრძელდება" - ხატია დეკანოიძე

🔲 "ბიზნესს კლასს აგიღებთ ქალაქის ცენტრში და გადადით რა მოსკოვში" - ნანუკა ჟორჟოლიანი ქეთი დოლიძეს მიმართავს