საქართველოს ნევროლოგთა და ნეიროქირურგთა ასოციაციის წევრი მიხეილ ვირსალაძე გარდაიცვალა

47 სამეცნიერო ნაშრომის ავტორი, მრავალი საერთაშორისო და ადგილობრივი სამედიცინო კონფერენციის მონაწილე, მსოფლიოს ნევროლოგთა ფედერაციის, ევროპის ნევროლოგიური საზოგადოებების ფედერაციის (EFNS), ეპილეფსიასთან ბრძოლის საერთაშორისო ლიგისა და საქართველოს ნევროლოგთა და ნეიროქირურგთა ასოციაციის წევრი მიხეილ ვირსალაძე გარდაიცვალა - სამწუხარო ინფორმაციას სოციალურ ქსელში  „ნიუ ჰოსპიტალსის“ ავრცელებს. 

„ღრმა მწუხარებით გაცნობებთ, რომ 86 წლის ასაკში გარდაიცვალა ექიმი ნევროლოგი, ეპილეპტოლოგი და მედიცინის დოქტორი, მიხეილ ვირსალაძე (1938-2024). ბატონი მიხეილი „ნიუ ჰოსპიტალსის“ კოლექტივისათვის და მთელი ქვეყნისთვის უდიდესი დანაკლისია.

მთელი თავისი ცხოვრება და პროფესიული გამოცდილება ბატონმა მიხეილმა ნევროლოგიის სფეროს განვითარებას მიუძღვნა.

მოღვაწეობის უმეტესი ნაწილი პ. სარაჯიშვილის სახელობის ნევროლოგიის ინსტიტუტში გაატარა. 60 წლის განმავლობაში აქტიურად მუშაობდა ნევროლოგიური დაავადებების და ეპილეფსიის მკურნალობის მიმართულებით.
მიხეილ ვირსალაძე იყო 47 სამეცნიერო ნაშრომის ავტორი, მრავალი საერთაშორისო და ადგილობრივი სამედიცინო კონფერენციის მონაწილე, მსოფლიოს ნევროლოგთა ფედერაციის, ევროპის ნევროლოგიური საზოგადოებების ფედერაციის (EFNS), ეპილეფსიასთან ბრძოლის საერთაშორისო ლიგისა (ILAE) და საქართველოს ნევროლოგთა და ნეიროქირურგთა ასოციაციის წევრი.

მისი წვლილი ნევროლოგიის განვითარებაში შეუფასებელია“, - წერია სამძიმრის წერილში.