"საქართველოში მედიის წარმომადგენლების უსაფრთხოების მხრივ საგანგაშო ვითარებაა" - ქარტია 5 ივლისის მოვლენებზე

ჟურნალისტური ეთიკის ქარტიის შეფასებით, საქართველოში მედიის წარმომადგენლების უსაფრთხოების მხრივ საგანგაშო ვითარებაა და მოუწოდებს ხელისუფლებას, დაუყოვნებლივ გადადგას ქმედითი ნაბიჯები მედიაგარემოს გაჯანსაღებისთვის.

ჟურნალისტური ეთიკის ქარტია მიიჩნევს, რომ 2021 წლის 5 ივლისს ხელისუფლებამ არ უზრუნველყო მედიის წარმომადგენლების დაცვა, ამასთან, სათანადოდ არ გამოუძიებია ეს საქმეები და არ მიუცია პასუხისგებაში ღირსების მარშის წინააღმდეგ გამართული აქციის ორგანიზატორები, რომელთა ვინაობაც საზოგადოებისთვის ცნობილია.

"აღსანიშნავია, რომ ხელისუფლების წარმომადგენლები აგრძელებენ აგრესიული რიტორიკით საუბარს მედიის წარმომადგენლებთან და კვლავაც გამოუძიებელია მედიაზე თავდასხმის ათობით საქმე.

ასეთი მიდგომა კიდევ უფრო მეტად ახალისებს მედიის წარმომადგენლებზე ძალადობას.

ჩვენი ქვეყნის ევროატლანტიკური ინტეგრაციისთვის აუცილებელია მედიის თავისუფლება და უსაფრთხოება", – წერს ქარტია განცხადებაში.

2021 წელს Tbilisi Pride-ის მიერ ორგანიზებული ღირსების მარში 5 ივლისს ვერ შედგა. მარშის არჩატარების გადაწყვეტილება Tbilisi Pride-ის ორგანიზატორებმა მას მერე მიიღეს, რაც ქალაქის ცენტრში ეკლესიის მიერ ორგანიზებულმა პუტინისტურმა ჯგუფებმა ათობით ადამიანზე, მათ შორის ჟურნალისტებზე იძალადეს.

ჯამში დაშავდა 53 ჟურნალისტი. მათ შორის კი მძიმედ დაშავებული ლექსო ლაშქარავა აქციაზე მიყენებული დაზიანებების შემდეგ კლინიკაში მოხვდა, საიდანაც გაწერიდან რამდენიმე დღის შემდეგ, საკუთარ სახლში ლოგინში გარდაცვლილი დედამ იპოვა.

ამავე თემაზე:

* "მეზიზღება 5 ივლისი, არ შემეძლო ამ დღეს ისევ იმ ქუჩებში მევლო და ისე გამეგრძელებინა ცხოვრება, ამ 5 ივლისს ცოტა შორს ვარ ... - მირანდა ბაღათურიას ემოციური პოსტი 5 ივლისის მოვლენებზე