შალვა პაპუაშვილი: დარწმუნებულები ვართ, რომ ჩვენი არგუმენტები არის აბსოლუტურად მყარი, იმისთვის, რომ მოვითხოვოთ ამა თუ იმ პარტიის საქმიანობის აკრძალვა

დარწმუნებულები ვართ, რომ ჩვენი არგუმენტები არის აბსოლუტურად მყარი, 100%-იანი არგუმენტები, იმისთვის, რომ მოვითხოვოთ ამა თუ იმ პარტიის საქმიანობის აკრძალვა, - განაცხადა პარლამენტის თავმჯდომარე, შალვა პაპუაშვილმა ჟურნალისტის კითხვის პასუხად, რომელიც პარტიების აკრძალვის შესახებ საკონსტიტუციო სარჩელს უკავშირდება.

„ყველაფერს ამოიკითხავთ სარჩელში, დასაბუთებულია ყველაფერი, საინტერესო გასაცნობი იქნება საზოგადოებისთვის, რა არგუმენტებით ვასაბუთებთ ჩვენს სასარჩელო მოთხოვნებს და დარწმუნებულები ვართ, რომ ჩვენი არგუმენტები არის აბსოლუტურად მყარი, 100%-იანი არგუმენტები, იმისთვის, რომ მოვითხოვოთ ამა თუ იმ პარტიის საქმიანობის აკრძალვა. ჩვენ ვუყურებთ იმას, არის ამა თუ იმ პარტიის ჩართულობა ანტიკონსტიტუციურ საქმიანობაში, ასევე ხარისხს, თუ როგორ უქმნის ესა თუ ის პარტია საფრთხეს კონსტიტუციურ წყობილებას“, - განაცხადა პაპუაშვილმა.

კითხვაზე - „მოითხოვს თუ არა „ქართული ოცნება“ მაგალითად გიორგი გახარიას პარტიის აკრძალვას, თუ რახან ისინი პარლამენტში შემოვლენ, შესაძლებელია, რომ ამ ფაქტორის გამო არ დააყენოთ ეს მოთხოვნა?“ - პაპუაშვილმა ასე უპასუხა:

„პარლამენტში საქმიანობას კავშირი არ აქვს პარტიასთან დაკავშირებით მიმართვაზე. მაგალითად მოლდოვაში აკრძალეს ერთ-ერთი პარტია, რომელსაც წევრები ჰყავდა პარლამენტში. ასე რომ ეს ურთიერთდაკავშირებული საკითხი არ არის. ჩვენი სარჩელი ეყრდნობა პარლამენტის საგამოძიებო კომისიის მუშაობას. 450-გვერდიანი დასკვნა არის კომისიის, ყველას შეუძლია გაეცნოს და ამოიკითხავს ამ დასკვნაში მათ შორის, ვინ არიან კანდიდატები, რომლებიც [შეიძლება] ჩვენს სარჩელში აღმოჩნდნენ“.