შალვა პაპუაშვილი: მხოლოდ ერთი ინტერესი აქვთ, როგორ დააზიანონ ჩვენი მეშვეობით რუსეთი. ჩვენ ვართ მხოლოდ იარაღი

აღარ ვიცი, თავს რატომ იწუხებენ კვლევით, ან ჩვენ რატომ ვიწუხებთ თავს კითხვით, რადგან ვხედავთ, რომ ბრიუსელს ასეთი რამ არ აინტერესებს. კვლევა, ემპირიული ანალიზი, ფაქტები აღარ არის ბრიუსელის ინტერესი, - განუცხადა ჟურნალისტებს საქართველოს პარლამენტის თავმჯდომარე შალვა პაპუაშვილმა ევროკავშირის კანდიდატ ქვეყნებში კანონის უზენაესობის მედეგობის შესახებ კვლევის შეფასებისას.

მისივე თქმით, ბრიუსელი სულ უფრო მეტად იყენებს ძალის პოლიტიკას.

„იციან, რომ რასა იუკნევიჩიანე რასაც იტყვის, ისაა სიმართლე - მორჩა! ჩვენ ვიმყოფებით ახალ ეპოქაში, როდესაც იტყვიან თეთრზე შავს და იტყვიან, რომ მე მაქვს ატომური ბომბი, ამიტომ თეთრზე ვიტყვი შავს და შენ უნდა გაიმეორო, რომ თეთრი არის შავი. მე მაქვს ეკონომიკური ბერკეტები - გეტყვის ბრიუსელი, ამიტომ შავზე ვიტყვი ახლა თეთრს და შენ უნდა თქვა, დიახ, ეს არის თეთრი. არანაირი სამართლიანი, ფაქტებზე დაფუძნებული დიალოგი აღარ არსებობს. ეს არის ჩვეულებრივი ძალის პოლიტიკა, რომელსაც დღეს ვხედავთ, რომ ბრიუსელი სულ უფრო მეტად იყენებს, მათ შორის იმ საგარეო-პოლიტიკური ხელმძღვანელობის ხელში, რომელშიც ახლა დღეს არის და ეს არის სწორედ ესტონიზაცია ევროკავშირის, რაზეც თეთრ სახლშიც საუბრობდნენ, ამიტომ კარგით, ჩვენმა მოქალაქეებმა იციან. 10 არჩევნები მოვიგეთ, მე-11, მე-12 და ასე შემდეგაც მოვიგებთ, რადგან ეს არის სიმართლე, მაგრამ სხვა რა ვქნათ?! ევროკავშირის ელჩს რომ ვუთხრათ, ეს არის-თქო, ხომ არ აინტერესებს მისთვის ავტორიტეტი არის რასა იუკნევიჩიანეს პოლიტიკური გეგმები და ამის განხორციელება.

დაივიწყეთ, არ არსებობს არანაირი შანსი იმის, რომ დღევანდელმა ბრიუსელმა გადადგას რაიმე ნაბიჯი რაიმე ობიექტურ ანალიზზე დაფუძნებით. ეს არის ჩვეულებრივი, ცივად გათვლილი პოლიტიკური გეგმები, რომელშიც ჩვენ მხოლოდ ინსტრუმენტი ვართ. არანაირი ინტერესი საქართველოს მიმართ არ აქვთ. მხოლოდ ერთი ინტერესი აქვთ, როგორ დააზიანონ ჩვენი მეშვეობით რუსეთი. ჩვენ ვართ მხოლოდ იარაღი“, - განაცხადა პაპუაშვილმა.

მისივე თქმით, ბრიუსელის თვალში საქართველოს მოსახლეობა ინსტრუმენტამდეა დაყვანილი, რომელიც გამოსაყენებელია მესამე ქვეყნის წინააღმდეგ.

ევროკავშირის კანდიდატ ქვეყნებში კანონის უზენაესობის მედეგობის შეფასება გამოქვეყნდა. ევროპული პოლიტიკის ინსტიტუტის შედეგებით, საქართველოსა და მონტენეგროს უმაღლესი შესრულება აქვთ. დანარჩენი კანდიდატი ქვეყნები კი საქართველოსა და მონტენეგროს ჩამორჩებიან.