შალვა პაპუაშვილი: საპარლამენტო დელეგაციის ბოლო ვიზიტი ვაშინგტონში გვიტოვებს იმედს, რომ ურთიერთობების გადატვირთვა და ახალი ნიშნულიდან დაწყება იქნება შესაძლებელი

საპარლამენტო დელეგაციის ბოლო ვიზიტი ვაშინგტონში გვიტოვებს იმედს, რომ ურთიერთობების გადატვირთვა და ახალი ნიშნულიდან დაწყება იქნება შესაძლებელი, - განაცხადა საქართველოს პარლამენტის თავმჯდომარემ შალვა პაპუაშვილმა.

მისივე თქმით, საქართველოს აშშ-სგან ქმედითი ნაბიჯების გადადგმის იმედი აქვს.

„ჩვენ ვხედავთ გარკვეულ პასიურობას, უფრო მეტის მოლოდინი გვაქვს და გარკვეულწილად იმედგაცრუება არის იმის კვალობაზე, რომ რაზედაც ჩვენ ვსაუბრობდით USAID-თან დაკავშირებით, ამერიკული ფულით საქართველოში ხელისუფლების ანტიდემოკრატიული ცვლილებების ხელშეწყობაზე, ეს ყველაფერი დაადასტურა თავად ტრამპის ადმინისტრაციამ, დახურა ის ორგანიზაციები, რომელიც სხვა ქვეყნებში ჩართული იყვნენ ამგვარ მავნებლურ საქმიანობაში.

როდესაც ჩვენ ვსაუბრობდით არაფორმალურ მმართველობაზე დაადასტურა ტრამპის ადმინისტრაციამ და ფაქტობრივად ტრამპი თავის პოლიტიკურ მტრებად აცხადებს იმ ძალებს, რომლებზეც ჩვენ ვსაუბრობდით, რომ მტრობენ საქართველოს. ამის ფონზე ის გარკვეული პასიურობა სამწუხაროა, თუმცა ჩვენ მოლოდინი გვაქვს, რომ შესაძლებელი იქნება უფრო მჭიდრო კონტაქტები და ურთიერთობების გადატვირთვა. ჩვენ ამჯერად ველით ნაბიჯებს აშშ-ის ახალი ადმინისტრაციისგან“, - აღნიშნა შალვა პაპუაშვილმა.